India vs Australia: గబ్బా కోటకు బీటలు.. నమోదైన పలు రికార్డులు ఇవే!!

Team India historic win at Gabba, Here is Records list

హైదరాబాద్: 'విరాట్‌ కోహ్లీ లేకుండా ఆస్ట్రేలియా గడ్డపై భారత జట్టు టెస్టు సిరీస్‌ గెలిస్తే.. ఏడాది మొత్తం సంబురాలు చేసుకోవచ్చు' అని సిరీస్‌ ఆరంభానికి ముందు ఆస్ట్రేలియా మాజీ కెప్టెన్‌ క్లార్క్‌ అన్నాడు. మైఖేల్‌ వాన్‌ నుంచి రికీ పాంటింగ్‌ వరకు ప్రతీ ఒక్కరు ప్రతికూల వ్యాఖ్యలు చేసినవారే. అయితే వారి అంచనాలు తప్పని నిరూపిస్తూ టీమిండియా చెలరేగింది. గాయాల కారణంగా ప్రధాన ఆటగాళ్లు దూరమైనా.. ఆసీస్ బౌలింగ్‌ను యువ ఆటగాళ్లు ఉతికి ఆరేస్తుంటే.. ఆసీస్‌ కెప్టెన్‌ టిమ్‌ పైన్‌ ముఖంలో నెత్తురు చుక్కలేక వెలవెలబోయిన తీరును భారత అభిమానులు ఇప్పట్లో మరిచిపోరు. బోర్డర్‌-గావస్కర్‌ ట్రోఫీలో భాగంగా ఆస్ట్రేలియాతో జరిగిన నాలుగో టెస్టులో రహానే సేన 3 వికెట్లతో ఘన విజయం సాధించింది. ఆసీస్‌ నిర్దేశించిన 328 పరుగుల లక్ష్యాన్ని 97 ఓవర్లలో ఏడు వికెట్లు కోల్పోయి ఛేదించింది.

గోడకు కొట్టిన బంతిలా:

తొలి టెస్టులో 36 పరుగులకే కుప్పకూలిన టీమ్‌ఇండియా ఇక కోలుకోవడం కష్టమే అనుకుంటే.. గోడకు కొట్టిన బంతిలా మిగిలిన మూడు మ్యాచ్‌ల్లో రెండింట నెగ్గి సిరీస్‌ చేజిక్కించుకుంది. కెప్టెన్‌ కోహ్లీ వ్యక్తిగత కారణాలతో స్వదేశానికి తిరుగు పయనమైనా.. అతడి స్థానంలో పగ్గాలు అందుకున్న రహానే జట్టును అద్భుతంగా ముందుకు నడిపాడు. నయావాల్‌ చతేశ్వర్‌ పుజారా గురించి ఎంతచెప్పినా తక్కువే. మూడో టెస్టు డ్రా కావడంతో పాటు నాలుగో టెస్టు చివర్లో ఆసీస్‌ పేసర్లు అలసిపోయేందుకు ప్రధాన కారణం అతడే. ఇక గిల్‌, పంత్‌ భయం లేని బ్యాటింగ్‌.. సుందర్‌, శార్దూల్‌ ఆల్‌రౌండ్‌ నైపుణ్యం భారత జట్టు భవిష్యత్తుపై భరోసానిచ్చాయి. అందరూ హీరోలవ్వడంతో కంగారూ గడ్డపై భారత్ రెండోసారి చిరస్మరణీయ విజయం సాధించింది. ఈ నేపథ్యంలోనే టెస్టు క్రికెట్‌లో పలు రికార్డులు నమోదయ్యాయి. అవేంటో ఓసారి చూద్దాం.