ధోనీ ఫామ్‌పై వీవీఎస్ ల‌క్ష్మ‌ణ్ షాకింగ్ కామెంట్స్‌!

ధోనీ జ‌ట్టులో ఉండ‌ట‌మే ఓ అదృష్టం..

మ‌హేంద్ర సింగ్ ధోనీ బ్యాటింగ్‌ను త‌ప్పు ప‌ట్టడం అవివేక‌మ‌ని వీవీఎస్ ల‌క్ష్మ‌ణ్‌ కుండ‌బ‌ద్ద‌లు కొట్టాడు. అత‌ని బ్యాటింగ్ శైలిని త‌ప్పు ప‌ట్టాల్సిన అవ‌స‌రం లేద‌ని అన్నాడు. ధోనీ జ‌ట్టుతో ఉండ‌ట‌మే ఓ అదృష్టంగా భావించాల‌ని, అత‌ని అనుభ‌వం జ‌ట్టుకు అవ‌స‌ర‌మ‌ని పేర్కొన్నాడు. ప్ర‌పంచ‌క‌ప్ వంటి మెగా టోర్న‌మెంట్‌ను ఆడుతున్న ప్ర‌స్తుత ప‌రిస్థితుల్లో ధోనీ వంటి అనుభ‌వ‌జ్ఞుడైన ఆట‌గాడు జ‌ట్టులో ఉండాల‌ని అన్నాడు. జ‌ట్టు మొత్తం యువ‌ర‌క్తంతో నిండి ఉన్న‌ప్పుడు ధోనీ వంటి ఆట‌గాడి నుంచి మెళ‌కువ‌ల‌ను నేర్చుకోవాల‌ని సూచించాడు. ఒక్కో మ్యాచ్‌లో నెమ్మ‌దిగా ఆడాల్సిన అవ‌స‌రం ఏర్ప‌డ‌వ‌చ్చ‌ని దీన్ని త‌ప్పు ప‌ట్ట‌డం స‌రికాద‌ని చెప్పాడు. బ్యాటింగ్ శైలి అనేది ప్ర‌త్య‌ర్థి జ‌ట్టు బౌలింగ్‌, పిచ్‌, వాతావ‌ర‌ణంపై ఆధార ప‌డి ఉంటుంద‌ని వీవీఎస్ ల‌క్ష్మ‌ణ్ అభిప్రాయ‌ప‌డ్డాడు. బౌలింగ్ ప‌దునుగా ఉన్న‌ప్పుడు భారీ షాట్ల‌ను ఆడ‌టం వ‌ల్ల వికెట్‌ను పారేసుకుంటున్న‌ట్టుతుంద‌ని చెప్పాడు. పిచ్‌కు అనుగుణంగా త‌న బ్యాటింగ్ శైలిని అప్ప‌టిక‌ప్పుడు మార్చుకునే స‌త్తా ధోనీకి ఉంద‌ని అన్నాడు.

ఫైన‌ల్ చేరేవి ఆ రెండు జ‌ట్లే..

ప్ర‌పంచ‌క‌ప్ టోర్న‌మెంట్‌లో ఫైన‌ల్ చేర‌బోయేవి ఆస్ట్రేలియా, భార‌త్ మాత్ర‌మేన‌ని వీవీఎస్ ల‌క్ష్మ‌ణ్ అంచ‌నా వేశాడు. ప్ర‌స్తుతానికి ఈ రెండు జ‌ట్ల మధ్యే గ‌ట్టి పోటీ నెల‌కొని ఉంద‌ని అన్నాడు. సెమీ ఫైన‌ల్ ఎవ‌రు? ఎవ‌రితో త‌ల‌ప‌డిన‌ప్ప‌టికీ.. ఫైన‌ల్‌లో మాత్రం ఆస్ట్రేలియా, భార‌త్ జ‌ట్లే ఆడ‌తాయ‌ని ఆయ‌న జోస్యం చెప్పాడు. ఆస్ట్రేలియా, భార‌త్ జ‌ట్ల మ‌ధ్యే ప్ర‌పంచ‌క‌ప్ విజేత ఎవ‌ర‌నే విష‌యంపై పోటీ నెల‌కొని ఉంద‌ని అన్నాడు. ప్ర‌పంచ‌క‌ప్ విజేతగా ఎవ‌రు ఆవిర్భ‌విస్తార‌నే విష‌యాన్ని ఇప్పుడే చెప్ప‌డం తొంద‌ర‌ప‌డిన‌ట్ట‌వుతుంద‌ని వీవీఎస్ ల‌క్ష్మ‌ణ్ చెప్పుకొచ్చాడు. ప్ర‌పంచ‌క‌ప్‌ను సాధించే అర్హ‌త‌, ముద్దాడే శ‌క్తి సామ‌ర్థ్యాలు ఆస్ట్రేలియా, టీమిండియాల‌కు మాత్ర‌మే ఉంద‌ని తేల్చి చెప్పాడు.

దినేష్ కార్తీక్ బెస్ట్ ఛాయిస్‌..

బ‌ర్మింగ్‌హామ్‌లోని ఎడ్జ్‌బాస్ట‌న్ స్టేడియంలో జ‌రిగే మ్యాచ్‌లో నంబ‌ర్ ఫోర్ స్థానంలో విజ‌య్ శంక‌ర్‌కు బ‌దులుగా దినేష్ కార్తీక్‌ను తీసుకుంటే బాగుంటుంద‌నేది త‌న వ్య‌క్తిగ‌త అభిప్రాయ‌మ‌ని అన్నాడు. దినేష్ కార్తీక్‌ను జ‌ట్టులోకి తీసుకోవ‌డం వ‌ల్ల మిడిలార్డ‌ర్ బ‌లోపేతమౌతుంద‌ని వీవీఎస్ ల‌క్ష్మ‌ణ్ అభిప్రాయ‌ప‌డ్డాడు. ప్ర‌పంచ‌క‌ప్ టోర్న‌మెంట్‌ను తొలిసారిగా ఎదుర్కొంటుండ‌టం వ‌ల్ల విజ‌య్ శంక‌ర్ ఒత్తిడికి గుర‌వుతున్నాడ‌ని చెప్పాడు. అత‌ని స్థానంలో దినేష్ కార్తీక్‌ను తీసుకుంటే బ్యాటింగ్ లైన‌ప్ దృఢ‌ప‌డుతుంద‌ని అన్నాడు. ఇంగ్లండ్ స‌హా ప‌లు అంతర్జాతీయ మ్యాచ్‌ల‌ను ఆడిన అనుభ‌వం దినేష్ కార్తీక్‌కు ఉంద‌ని, అత‌ణ్ని తుది జ‌ట్టులోకి తీసుకునే దిశ‌గా టీమ్ మేనేజ్‌మెంట్ ఆలోచ‌న చేయాల‌ని వీవీఎస్ ల‌క్ష్మ‌ణ్ అన్నాడు.