గెలిచి ఓడిన భారత్

జోహెన్స్ బర్గ్: మినీ వరల్డ్ కప్ గా పిలవబడే ఛాపింయన్స్ టోర్నిలో హాట్ ఫేవరెట్ గా బరిలోకి దిగిన టీం-ఇండియా కనీసం సెమీస్ కూడా చేరకుండానే ఇంటి మఖం పట్టింది. బుధవారం వెస్టిండీస్ తో జరిగిన మ్యాచ్ లో గెలిచినప్పటికీ ఆస్ట్రేలియాతో జరిగిన మ్యాచ్ లో పాకిస్థాన్ ఓటమి పాలు అవడంతో భారత్ సెమీస్ ఆశల పై నీళ్లు చల్లినట్టు అయింది. నామమాత్రంగా జరిగిన భారత్-విండీస్ సమరంలో టాస్ గెలిచిన భారత్ విండీస్ ను బ్యాటింగ్ కు ఆహ్వానించింది.

భారత్ బౌలర్లు ప్రవీణ్(22/3), నెహ్రా(31/3) రాణించడంతో విండీస్ 36 ఓవర్లలో 129 పరుగులకే కుప్పకూలింది. ఆ తర్వాత బ్యాటింగ్ చేసిన భారత్ విరాట్ కోహ్లీ(76 నాటౌట్) రాణించడంతో మూడు వికెట్లు మాత్రమే నష్టపోయి మరో 107 బంతులు మిగిలుండగానే విజయతీరాలకు చేరింది. మ్యాన్ ఆఫ్ ద మ్యాచ్ గా విరాట్ కోహ్లీ ఎన్నికయ్యాడు. సెమీస్ కు చేరుకోకపోవడం పై స్పందించిన టీం-ఇండియా కెప్టన్ ధోనీ ట్వంటీ ట్వంటీ వరల్డ్ కప్ లో పోల్చితే తాము అన్ని విభాగాల్లోనూ ఆశించినంతగా రాణించలేదని తెలిపాడు. యువరాజ్, సెహ్వాగ్ లేని లోటు బాగా కనిపించిదని అన్నాడు.