Tamannaah Bhatia: పాక్ క్రికెటర్‌తో తమన్నా పెళ్లి?

Tamannaah Bhatia: పాకిస్థాన్ క్రికెట్ జట్టు మాజీ ఆల్‌రౌండర్ అబ్దుల్ రజాక్, నటి తమన్నా భాటియాతో తన సంబంధంపై వచ్చిన పుకార్ల కారణంగా మరోసారి వార్తల్లో నిలిచారు. 2020లో రజాక్, తమన్నాల మధ్య ప్రేమ వ్యవహారం, వివాహం గురించి తీవ్రమైన ఊహాగానాలు చెలరేగాయి. ఈ వార్తలపై తమన్నా భాటియా ఇటీవల ఒక ఇంటర్వ్యూలో స్పష్టతనిస్తూ వాటిని పూర్తిగా ఖండించారు.

పుకార్లపై తమన్నా భాటియా వివరణ
2020లో తమన్నా భాటియా పాకిస్తానీ క్రికెటర్ అబ్దుల్ రజాక్‌ను రహస్యంగా పెళ్లి చేసుకున్నారని వార్తలు జోరుగా ప్రచారంలోకి వచ్చాయి. అయితే ఈ వార్తల్లో ఎలాంటి నిజం లేదని తమన్నా తాజాగా వెల్లడించారు. "ఇంటర్నెట్ చాలా సరదా ప్రదేశం" అని పేర్కొంటూ, ఇంటర్నెట్ ప్రకారం తాను కొంతకాలం అబ్దుల్ రజాక్‌ను వివాహం చేసుకున్నానని చమత్కరించారు.

అబ్దుల్ రజాక్‌తో తన పరిచయం గురించి వివరిస్తూ.. "అబ్దుల్ రజాక్‌తో నా మొదటి పరిచయం ఒక నగల దుకాణం ప్రారంభోత్సవం సందర్భంగా జరిగింది. అక్కడ కలిశాం తప్ప, మా మధ్య ఎలాంటి వ్యక్తిగత సంబంధాలు లేవు" అని తమన్నా స్పష్టం చేశారు. ఈ పుకార్ల వల్ల తాను ఎంతో సిగ్గుపడ్డానని.. "క్షమించండి సార్. మీకు పిల్లలు ఉన్నారు. మీ జీవితం గురించి నాకు ఏమీ తెలియదు, కానీ ఈ పుకార్లు చాలా సిగ్గుచేటుగా ఉన్నాయి" అంటూ రజాక్‌కు పరోక్షంగా క్షమాపణలు కూడా చెప్పారు. తమన్నా ఇచ్చిన ఈ స్పష్టతతో అబ్దుల్ రజాక్‌తో ఆమె ఎఫైర్ వార్తలకు తెరపడింది.

పాకిస్థానీ క్రికెటర్ అబ్దుల్ రజాక్ ఎవరు?
అబ్దుల్ రజాక్ పాకిస్థాన్ క్రికెట్ జట్టులో గొప్ప ఆల్‌రౌండర్. అతను 1996లో పాకిస్థాన్ తరఫున అంతర్జాతీయ అరంగేట్రం చేశాడు. అబ్దుల్ రజాక్ తన మీడియం పేస్ బౌలింగ్‌తో పాటు తన వేగవంతమైన బ్యాటింగ్‌కు కూడా ప్రసిద్ధి చెందారు. తన ఆల్ రౌండ్ ఆటతో అతను పాకిస్థాన్‌కు చాలా సార్లు విజయం సాధించడంలో కీలక పాత్ర పోషించాడు. అబ్దుల్ రజాక్ కెరీర్ గురించి చెప్పాలంటే, అతను పాకిస్తాన్ తరపున 265 వన్డేలు ఆడి 5,080 పరుగులు చేయడమే కాకుండా 269 వికెట్లు కూడా పడగొట్టాడు. దీనితో పాటు అతను 46 టెస్ట్ మ్యాచ్‌లలో కూడా ఆడాడు. టెస్ట్ క్రికెట్‌లో అబ్దుల్ రజాక్ 1946 పరుగులు చేసి 100 వికెట్లు తీశాడు. టీ20 ఫార్మాట్‌లో అబ్దుల్ రజాక్ పాకిస్తాన్ తరపున 32 మ్యాచ్‌లలో 393 పరుగులు చేయడంతో పాటు 20 వికెట్లు కూడా తీసుకున్నాడు.