T20 World Cup 2021: మెరిసిన స్మిత్.. దక్షిణాఫ్రికాపై ఘన విజయం! ప్రపంచకప్‌లో బోణీ ఆస్ట్రేలియాదే!!

ఆదిలోనే భారీ షాక్:

119 పరుగుల స్వల్ప లక్ష్య ఛేదనలో ఆస్ట్రేలియాకు ఆదిలోనే భారీ షాక్ తగిలింది. కెప్టెన్ ఆరోన్ ఫించ్ డకౌట్ అయ్యాడు. డేవిడ్ వార్నర్ (14), మిచెల్ మార్ష్ (11) కూడా తక్కువ పరుగులకే పెవిలియన్ చేరారు. దాంతో ఆసీస్ 38 పరుగులకే 3 వికెట్లు కోల్పోయింది. అయితే స్టీవ్ స్మిత్, గ్లెన్ మ్యాక్స్‌వెల్ జట్టును ఆదుకున్నారు. ఈ జోడి నాలుగో వికెట్‌కి 42 పరుగుల భాగస్వామ్యం జోడించిచింది. 34 బంతుల్లో 3 ఫోర్లతో 35 పరుగులు చేసిన స్మిత్.. నోర్జ్ బౌలింగ్‌లో మార్క్‌రమ్ పట్టిన కళ్లు చెదిరే క్యాచ్‌కి పెవిలియన్ చేరాడు. ఆ తర్వాత 21 బంతుల్లో ఓ ఫోర్‌తో 18 పరుగులు చేసిన మ్యాక్స్‌వెల్ కూడా రివర్స్ స్వీప్‌కి ప్రయత్నించి షంసీ బౌలింగ్‌లో బౌల్డ్ అయ్యాడు. దీంతో మ్యాచ్ ఉత్కంఠకు దారి తీసింది.

స్టోయినిస్, వేడ్ కలిసి:

అయితే ఆఖర్లో గ్లేన్ మ్యాక్స్‌వెల్ అవుటైన తర్వాత మార్కస్ స్టోయినిస్, మాథ్యూ వేడ్ కలిసి పోరాడారు. 24 బంతుల్లో 36 పరుగులు కావాల్సిన దశలో కాగిసో రబాడా వేసిన 17వ ఓవర్‌లో వేడ్ 11 పరుగులు రాబట్టాడు. ఆ తర్వాత పెట్రోరియస్ వేసిన 18వ ఓవర్‌లో 7 పరుగులు మాత్రమే వచ్చాయి. నోర్జ్ వేసిన 19వ ఓవర్లో 10 పరుగులు వచ్చాయి. ఆఖరి 6 బంతుల్లో 8 పరుగులు కావాల్సిన స్థితిలో మొదటి బంతికి 2 పరుగులు వచ్చాయి. తర్వాతి బౌండరీ రావడంతో సీన్ పూర్తి ఆసీస్‌వైపు మళ్లింది. ఇక నాలుగో బంతికి మరో బౌండరీ రావడంతో ఆసీస్ విజయాన్ని అందుకుంది.

ఆదుకున్న మార్క్రామ్:

ఈ మ్యాచ్‌లో టాస్ గెలిచిన ఆస్ట్రేలియా కెప్టెన్ అరోన్ ఫించ్ ఫీల్డింగ్ ఎంచుకున్నాడు. దాంతో ముందుగా బ్యాటింగ్ చేసిన దక్షిణాఫ్రికా నిర్ణీత 20 ఓవర్లలో 9 వికెట్ల నష్టానికి 118 రన్స్ చేసింది. ప్రోటీన్ ఓపెనర్లు క్వింటన్ డికాక్ (7: 12 బంతుల్లో 1x4), తెంబా బవుమా (12: 7 బంతుల్లో 2x4) పేలవరీతిలో వికెట్లు చేజార్చుకున్నారు. ఆపై వాన్ డెర్ డ్యూసెన్ కూడా విఫలమయ్యాడు. స్టార్ బ్యాటర్ డ్యూసెన్ మూడు బంతులల్లో 2 రన్స్ చేశాడు. ఈ సమయంలో ఐడెన్ మార్క్రామ్ జట్టును ఆదుకున్నాడు. 36 బంతుల్లో మూడు ఫోర్లు, ఓ సిక్స్ సాయంతో 40 పరుగులు చేశాడు.హెన్రిచ్ క్లాసెన్ (13: 13 బంతుల్లో 2x4) అండతో మార్క్రామ్ పరుగులు చేశాడు. దీంతో ప్రొటీస్ స్కోర్ బోర్డు ముందుకు కదిలింది.

బ్యాట్ జులిపించిన రబాడ:

అయితే ఒకవైపు మార్క్రామ్ పోరాడుతున్నా.. డేవిడ్ మిల్లర్ (16: 18 బంతుల్లో), ప్రిటోరియస్ (1) తక్కువ స్కోరుకే ఔటవడంతో దక్షిణాఫ్రికా కనీసం 100 పరుగుల మార్కుని కూడా చేరేలా కనిపించలేదు. కానీ చివర్లలలో పట్టుదలతో క్రీజులో నిలిచిన పేస్ బౌలర్ కాగిసో రబాడ.. దక్షిణాఫ్రికా జట్టుకు మంచి స్కోర్ అందించాడు. అతడు ఆఖరి ఓవర్‌లో ఓ సిక్స్ కూడా కొట్టడం విశేషం. రబాడ బ్యాట్ జులిపించడంతో ప్రొటీస్ స్కోర్ 100 దాటింది. మొత్తంగా సఫారీ జట్టులో ఆరుగురు బ్యాట్స్‌మెన్‌లు సింగిల్ డిజిట్‌ స్కోరుకే పరిమితమయ్యారు. టీ20 ప్రపంచకప్‌ 2021లోని మొదటి మ్యాచే అభిమానులను నిరాశపరిచింది.