సూపర్-8 వార్.. నేటి నుంచే అసలైన మజా! టీమిండియా షెడ్యూల్ ఇదే!

టీ20 ప్రపంచ కప్ 2026 సమరం ఇప్పుడు అత్యంత ఉత్కంఠభరితమైన దశకు చేరుకుంది. గత కొన్ని రోజులుగా జరిగిన గ్రూప్ దశ మ్యాచులు ముగియడంతో టోర్నమెంట్లో పాల్గొన్న 20 జట్లలో 12 జట్లు నిష్క్రమించాయి. ఇప్పుడు మిగిలిన 8 జట్లు టైటిల్ పోరు కోసం సిద్ధమయ్యాయి. నేటి(ఫిబ్రవరి 21) నుంచి సూపర్-8 పోరాటం ప్రారంభం కానుంది. ఈ దశలో మొత్తం 9 రోజుల పాటు 12 హై-వోల్టేజ్ మ్యాచులు జరగనున్నాయి. ఈ మ్యాచ్‌లలో గెలిచిన టాప్ జట్లు సెమీఫైనల్‌కు అర్హత సాధిస్తాయి.

అనూహ్య మార్పులు.. ఆస్ట్రేలియా అవుట్!
ఈసారి సూపర్-8 సమీకరణాలు అందరినీ ఆశ్చర్యపరిచాయి. ఐసీసీ ముందుగా అంచనా వేసిన 8 జట్లలో ఏడు జట్లు తమ స్థానాలను నిలబెట్టుకోగా.. బలమైన ఆస్ట్రేలియా జట్టు మాత్రం సూపర్-8 రేసు నుంచి తప్పుకుంది. ఆస్ట్రేలియా స్థానంలో జింబాబ్వే అద్భుత ప్రదర్శనతో ఈ జాబితాలో చేరింది. ప్రస్తుతం గ్రూప్-1లో భారత్, దక్షిణాఫ్రికా, వెస్టిండీస్, జింబాబ్వే ఉన్నాయి. గ్రూప్-2లో పాకిస్థాన్, ఇంగ్లాండ్, న్యూజిలాండ్, ఆతిథ్య శ్రీలంక జట్లు తలపడనున్నాయి.

టీమిండియా షెడ్యూల్
సూర్యకుమార్ యాదవ్ నేతృత్వంలోని భారత జట్టు తన సూపర్-8 ప్రయాణాన్ని ఆదివారం (ఫిబ్రవరి 22) అహ్మదాబాద్‌లోని నరేంద్ర మోదీ స్టేడియంలో దక్షిణాఫ్రికాతో ప్రారంభించనుంది. గత ప్రపంచ కప్ ఫైనలిస్టుల మధ్య జరగనున్న ఈ మ్యాచ్ ప్రేక్షకులకు కనువిందు చేయనుంది. ఆ తర్వాత ఫిబ్రవరి 26న చెన్నైలో జింబాబ్వేతో, మార్చి 1న కోల్‌కతాలో వెస్టిండీస్‌తో భారత్ తలపడుతుంది. భారత జట్టు సెమీస్ చేరాలంటే కనీసం రెండు మ్యాచ్‌లలో విజయం సాధించడం అత్యవసరం.

వేదికలు, సెమీఫైనల్ రేసు
ఈ సూపర్-8 మ్యాచులు భారత్, శ్రీలంకలోని ప్రముఖ స్టేడియాలలో జరగనున్నాయి. కొలంబోలోని ప్రేమదాస స్టేడియం, పల్లెకెలె, అహ్మదాబాద్, ముంబై, చెన్నై మైదానాలు ఈ కీలక పోరుకు ఆతిథ్యమిస్తున్నాయి. సూపర్-8 ముగిసిన తర్వాత, రెండు గ్రూపుల నుంచి టాప్-2లో నిలిచిన నాలుగు జట్లు సెమీఫైనల్‌కు చేరుకుంటాయి. మార్చి 4, 5 తేదీల్లో సెమీఫైనల్స్ నిర్వహించి, మార్చి 8న గ్రాండ్ ఫైనల్ ద్వారా ప్రపంచ విజేత ఎవరో తేలిపోనుంది.

సూపర్-8 పూర్తి షెడ్యూల్ :
ఫిబ్రవరి 21: న్యూజిలాండ్ vs పాకిస్థాన్ (కొలంబో, రాత్రి 7:00)

ఫిబ్రవరి 22: ఇంగ్లాండ్ vs శ్రీలంక (పల్లెకెలె,మధ్యాహ్నం 3:00) & భారత్ vs సౌతాఫ్రికా (అహ్మదాబాద్, రాత్రి 7:00)

ఫిబ్రవరి 23: జింబాబ్వే vs వెస్టిండీస్ (ముంబై, రాత్రి 7:00)

ఫిబ్రవరి 24: ఇంగ్లాండ్ vs పాకిస్థాన్ (పల్లెకెలె, రాత్రి 7:00)

ఫిబ్రవరి 25: న్యూజిలాండ్ vs శ్రీలంక (కొలంబో, రాత్రి 7:00)

ఫిబ్రవరి 26: సౌతాఫ్రికా vs వెస్టిండీస్ (అహ్మదాబాద్, మధ్యాహ్నం 3:00) & భారత్ vs జింబాబ్వే (చెన్నై, రాత్రి 7:00)

ఫిబ్రవరి 27: ఇంగ్లాండ్ vs న్యూజిలాండ్ (కొలంబో, రాత్రి 7:00)

ఫిబ్రవరి 28: పాకిస్థాన్ vs శ్రీలంక (పల్లెకెలె, రాత్రి 7:00)

మార్చి 1: జింబాబ్వే vs సౌతాఫ్రికా (ఢిల్లీ, మధ్యాహ్నం 3:00) & భారత్ vs వెస్టిండీస్ ( కోల్‌కతా, రాత్రి 7:00)