గిల్‌లాగే వేటు పడాల్సిందే కానీ.. చివరి నిమిషంలో ట్విస్ట్!

T20 World Cup 2026: వచ్చే ఏడాది జరగనున్న టీ20 ప్రపంచ కప్ 2026 కోసం టీమిండియా ఎంపిక అనేక చర్చలకు దారితీస్తోంది. ఫామ్ సమస్యతో స్టార్ ఓపెనర్ శుభ్‌మన్ గిల్‌పై వేటు పడగా.. దాదాపు అదే స్థాయిలో విఫలమవుతున్న సూర్యకుమార్ యాదవ్ మాత్రం జట్టులో చోటు దక్కించుకున్నారు. అయితే దీని వెనుక సూర్య బ్యాటింగ్ ప్రతిభ కంటే అతని కెప్టెన్సీ ప్రధాన కారణమని విశ్లేషణలు వినిపిస్తున్నాయి.

గణాంకాల్లో గిల్ కంటే సూర్య వెనుకబడి ఉన్నాడా?
సెలెక్టర్లు శుభ్‌మన్ గిల్‌ను పక్కన పెట్టడానికి కారణం అతడి పేలవమైన స్ట్రైక్ రేట్ అని చెప్పారు. కానీ ఓ సారి గణాంకాలను పరిశీలిస్తే సూర్యకుమార్ యాదవ్ పరిస్థితి మరింత ఆందోళనకరంగా ఉంది. శుభ్‌మన్ గిల్ గత 15 ఇన్నింగ్స్‌ల్లో 137.26 స్ట్రైక్‌రేట్‌తో 291 పరుగులు చేశాడు. సూర్యకుమార్ యాదవ్ ఈ ఏడాది ఆడిన 19 ఇన్నింగ్స్‌ల్లో 123.2 స్ట్రైక్ రేట్‌తో కేవలం 218 పరుగులు మాత్రమే చేశాడు. ఇది సూర్య కెరీర్‌లోనే అత్యంత దారుణమైన ప్రదర్శన కావడం గమనార్హం.

కెప్టెన్సీయే శ్రీరామరక్ష!
ఓ నివేదిక ప్రకారం.. కేవలం జట్టుకు కెప్టెన్ అనే ఒకే ఒక్క కారణంతో సూర్యకుమార్ యాదవ్ జట్టులో కొనసాగుతున్నారు. వరల్డ్ కప్ వంటి మెగా టోర్నమెంట్‌కు ముందు కెప్టెన్‌ను మార్చడం జట్టు స్థిరత్వాన్ని దెబ్బతీస్తుందని సెలక్టర్లు భావించారు. ఒకవేళ సూర్యకుమార్ సాధారణ ప్లేయర్ అయి ఉంటే, గిల్‌కు ఎదురైన పరిస్థితే ఆయనకూ ఎదురయ్యేదని క్రికెట్ వర్గాలు చర్చించుకుంటున్నాయి.

గౌతమ్ గంభీర్ వార్నింగ్: 'పేరు ముఖ్యం కాదు.. పరుగులే ముఖ్యం'
హెడ్ కోచ్ గౌతమ్ గంభీర్ స్టైల్ తెలిసిన వారికి ఒక విషయం స్పష్టంగా అర్థమవుతుంది. గంభీర్ జట్టులో కేవలం గెలుపుకు, ప్రదర్శనకు మాత్రమే ప్రాధాన్యత ఇస్తారు. "నేడు గిల్ వెలుపల ఉన్నాడు, రేపు సూర్యకుమార్ కూడా అదే పరిస్థితిని ఎదుర్కోవచ్చు. గంభీర్ జట్టులో ఎవరూ శాశ్వతం కాదు" అని నివేదికలు హెచ్చరిస్తున్నాయి.

సంజూ శాంసన్.. ది న్యూ ఛాలెంజర్!
శుభ్‌మన్ గిల్‌‌కు చోటు ఇవ్వకుండా సెలెక్టర్లు సంజూ శాంసన్‌పై నమ్మకం ఉంచారు. దక్షిణాఫ్రికాపై సంజూ శాంసన్ మెరుపు ఇన్నింగ్స్ (22 బంతుల్లో 37 పరుగులు) అతనికి ప్లస్ పాయింట్‌గా మారింది. అభిషేక్ శర్మ వంటి యువ ఆటగాళ్లు మెరుపు వేగంతో పరుగులు సాధిస్తుండటంతో సీనియర్లు తమ ఫామ్‌ను నిరూపించుకోవాల్సిన కత్తిమీద సాము లాంటి పరిస్థితి నెలకొంది. టీ20 వరల్డ్ కప్ సూర్యకుమార్ యాదవ్‌కు ఆఖరి అవకాశం కావచ్చు.పేరు చూసి జట్టులోకి తీసుకునే రోజులు పోయాయి, కేవలం ప్రదర్శన మాత్రమే ప్రామాణికం. గిల్ ఔట్ కావడంతో అక్షర్ పటేల్ వైస్ కెప్టెన్‌గా బాధ్యతలు చేపట్టారు.