T20 World Cup 2026: పాక్‌పై ప్రతీకారం తీర్చుకునేందుకు గ్యారీ కిర్‌స్టన్ సిద్ధం!

T20 World Cup 2026: భారత జట్టుకు 2011లో ప్రపంచ కప్ అందించిన హెడ్ కోచ్ గ్యారీ కిర్‌స్టన్‌ను పాకిస్తాన్ క్రికెట్ బోర్డు తమతో చేర్చుకుంది. ఈ దిగ్గజానికి పాకిస్తాన్ తగిన గౌరవం ఇస్తుందని అందరూ భావించినా అది జరగలేదు. బదులుగా ఆయనకు పరాభవం ఎదురైంది. పాకిస్తాన్ క్రికెట్ జట్టు నుంచి ఎదురైన ఈ మోసం తర్వాత గ్యారీ కిర్‌స్టన్‌కు కొత్త ఉద్యోగం లభించింది. టీ20 ప్రపంచ కప్ 2026కు ముందు ఆయనకు కీలక బాధ్యత అప్పగించారు.

దక్షిణాఫ్రికాకు చెందిన ప్రపంచ కప్ విజేత కోచ్ గ్యారీ కిర్‌స్టన్‌కు పాకిస్తాన్ జట్టు ఇవ్వాల్సిన గౌరవాన్ని ఇవ్వలేకపోయింది. ఇప్పుడు గ్యారీ ఆ చేదు అనుభవాన్ని దాటుకొని ముందుకు సాగుతున్నారు. టీ20 ప్రపంచ కప్ 2026కు ముందు ఒక జట్టుకు చాలా పెద్ద బాధ్యతను ఆయన స్వీకరించారు. ఈ టోర్నమెంట్‌లో ఆయన తన కొత్త జట్టుతో టీమిండియాకు సవాల్ విసరాలని చూస్తున్నారు. ముఖ్యంగా గౌతమ్ గంభీర్ నేతృత్వంలోని జట్టుకు ఆయన గట్టి పోటీ ఇవ్వాలని భావిస్తున్నారు.

గ్యారీ కిర్‌స్టన్‌కు కొత్త ఉద్యోగం
టీ20 ప్రపంచ కప్ 2026కు ముందు గ్యారీ కిర్‌స్టన్‌ను నమీబియా క్రికెట్ జట్టు తమకు సలహాదారుగా నియమించుకుంది. భారత్, శ్రీలంకలలో జరగబోయే ఈ టోర్నమెంట్‌లో నమీబియా జట్టు గ్రూప్-Aలో ఉంది. ఈ గ్రూప్‌లో నమీబియాతో పాటు భారత్, పాకిస్తాన్, నెదర్లాండ్స్, అమెరికా జట్లు ఉన్నాయి. ఈ గ్రూప్ నుంచి టాప్ 2 స్థానాల్లోకి రావాలంటే గ్యారీ కిర్‌స్టన్‌ కొత్త జట్టు నమీబియా..ఆయన పాత జట్లైన భారత్ లేదా పాకిస్తాన్‌లలో కనీసం ఒక జట్టునైనా ఓడించాల్సి ఉంటుంది. కిర్‌స్టన్‌కు పాకిస్థాన్ జట్టు నుంచి ఎదురైన అవమానం దృష్ట్యా ఆయన పాక్ జట్టును ఓడించి తనను తాను నిరూపించుకోవాలని భావించే అవకాశం ఉంది. గ్యారీ కిర్‌స్టన్ తన కోచింగ్ కెరీర్‌లో అనేక పెద్ద జట్లకు సేవలు అందించారు. ఆ అనుభవం ఇప్పుడు నమీబియా జట్టుకు ఎంతగానో ఉపయోగపడుతుంది.

కొత్త బాధ్యతపై గ్యారీ స్పందన
నమీబియా జట్టుకు సలహాదారుగా మారిన తర్వాత గ్యారీ కిర్‌స్టన్ మాట్లాడుతూ.. "క్రికెట్ నమీబియాతో కలిసి పనిచేయడం నాకు నిజంగా సంతోషాన్ని ఇచ్చింది. హై-పెర్ఫార్మెన్స్ క్రికెట్ వాతావరణాన్ని సృష్టించాలనే వారి నిబద్ధత, పట్టుదల నన్ను ఎంతగానో ఆకట్టుకున్నాయి. వారి కొత్త స్టేట్ ఆఫ్ ది ఆర్ట్ క్రికెట్ స్టేడియం.. జాతీయ జట్టు ప్రపంచంలోని అత్యుత్తమ క్రికెట్ దేశాలతో పోటీ పడేలా చూడడానికి వారు ఎంతగా కట్టుబడి ఉన్నారో నిరూపిస్తుంది. వారి సీనియర్ పురుషుల జాతీయ జట్టు బాగా ఆడుతోంది. వచ్చే ఏడాది ఫిబ్రవరిలో జరగబోయే టీ20 ప్రపంచ కప్ కోసం వారి సన్నాహాల్లో విలువను జోడించడానికి నేను ఆసక్తిగా ఎదురుచూస్తున్నాను," అని కిర్‌స్టన్ అన్నారు.