T20 World Cup 2024: పొట్టి ప్రపంచకప్‌కు దూసుకొచ్చిన ఉగాండా.. జింబాబ్వేకు షాక్!

వచ్చే ఏడాది జరిగే పొట్టి ప్రపంచ కప్‌లో తలపడే చివరి జట్టు ఏదో తేలిపోయింది. ఆఫ్రికాకు చెందిన ఉగాండా ఈ స్థానాన్ని సొంతం చేసుకుంది. తాజాగా ర్వాండాతో జరిగిన మ్యాచులో ఉగాండా చాలా ఈజీగా విజయం సాధించింది. దీంతో వచ్చే ఏడాది జరిగే టీ20 వరల్డ్ కప్ ఆడే జట్ల జాబితాలో చివరిదైన 20వ స్థానాన్ని ఉగాండా సొంతం చేసుకుంది.

ఈ మ్యాచులో తొలుత బ్యాటింగ్ చేసిన ర్వాండా.. 18.5 ఓవర్లలో కేవలం 65 పరుగులకే ఆలౌట్ అయింది. ఈ స్వల్ప లక్ష్యాన్ని ఉగాండా 8.1 ఓవర్లలోనే ఛేదించి ఘనవిజయం నమోదు చేసుకుంది. వెస్టిండీస్, యూఎస్ఏ వేదికగా జరగనున్న టీ20 వరల్డ్ కప్‌లో మొత్తం 20 జట్లు తలపడనున్న సంగతి తెలిసిందే. ఇటీవలే ఆఫ్రికాకు చెందిన నమీబియా కూడా ఈ వరల్డ్ కప్‌కు అర్హత సాధించిన సంగతి తెలిసిందే.

టాంజానియాను ఓడించిన నమీబియా.. వరల్డ్ కప్‌లో తమ బెర్తును ఖరారు చేసుకుంది. ఇప్పుడు మరో ఆఫ్రికా దేశం ఉగాండా కూడా వరల్డ్ కప్ బెర్తు ఖాయం చేసుకుంది. అయితే ఎన్నో అంచనాలతో ఈ క్వాలిఫైయర్స్ ఆడిన జింబాబ్వేకు మాత్రం పరాభవం తప్పలేదు. ఈ క్వాలిఫైయర్స్‌లో నమీబియా, ఉగాండా చేతిలో జింబాబ్వే ఓటమిపాలైంది.

ఈ రెండు ఓటములు జింబాబ్వే అవకాశాలను బాగా దెబ్బతీశాయి. ఇక తమ చివరి మ్యాచులో కెన్యాను జింబాబ్వే చిత్తుగా ఓడించింది. ఈ మ్యాచులో తొలుత బ్యాటింగ్ చేసిన జింబాబ్వే 217 పరుగులు చేసింది. కెన్యా ఈ మ్యాచులో నిర్ణీత 20 ఓవర్లలో 8 వికెట్ల నష్టానికి కేవలం 107 పరుగులు మాత్రమే చేయగలిగింది. ఈ భారీ విజయం సాధించినా కూడా జింబాబ్వే.. వరల్డ్ కప్‌కు అర్హత సాధించలేదు. ఉగాండా ఈ స్థానాన్ని భర్తీ చేసింది.

2024 టీ20 వరల్డ్ కప్ ఆడే 20 జట్టు: వెస్టిండీస్, యూఎస్ఏ, ఆస్ట్రేలియా, ఇంగ్లండ్, ఇండియా, నెదర్లాండ్స్, న్యూజిల్యాండ్, పాకిస్తాన్, ఆఫ్ఘనిస్తాన్, బంగ్లాదేశ్, ఐర్లాండ్, స్కాట్లాండ్, పపువా న్యూగినియా, కెనడా, నేపాల్, ఒమన్, నమీబియా, ఉగాండా