అసీస్ ఆటగాడు సైమోపై మరో దెబ్బ

సిడ్నీ‌: ఆస్ట్రేలియా ఆల్ రౌండర్ ఆండ్ర్యూ సైమండ్స్ అంతర్జాతీయ క్రికెట్ కెరీర్ ముగిసినట్లే కనిపిస్తోంది. ప్రపంచ కప్ ట్వంటీ 20 జట్టు నుంచి ఉద్వాసనకు గురైన సైమండ్స్ పై మరో వేటు పడింది. వచ్చే సీజన్ లో అతని కాంట్రాక్టులను క్రికెట్ అస్టేలియా రద్దు చేసింది. వచ్చే నెల 2009 - 10 సంవత్సరానికి గాను కాంట్రాక్టు కుదుర్చుకున్న 25 ఆస్ట్రేలియా ఆటగాళ్లలో సైమండ్స్ ఒకడు.

సైమండ్స్ స్థానంలో ఫాస్ట్ బౌలర్ షాన్ టైట్ కు కాంట్రాక్టు ఇస్తున్నట్లు ఆస్ట్రేలియా నేషనల్ సెలెక్టర్లు శుక్రవారం ప్రకటించారు. ఈ స్థితిలో సైమండ్స్ అంతర్జాతీయ క్రికెట్ నుంచి తప్పుకుంటానని ప్రకటించవచ్చునని ఆస్ట్రేలియా మీడియా భావిస్తోంది. ఇండియన్ ప్రీమియర్ లీగ్ (ఐపియల్) పై అతను దృష్టి సారించే అవకాశం ఉందని అంటున్నారు. అయితే సైమండ్స్ ఇంత వరకు ఏ నిర్ణయమూ తీసుకోలేదు. కానీ తను త్వరలోనే ఒక ప్రకటన చేస్తానని అతను చెప్పాడు.