నెక్స్ట్ ఇయర్ చూసుకుందాం.. ముంబై కొంపముంచింది ఇదే: సూర్యకుమార్ యాదవ్

ఐపీఎల్ 2026 సీజన్లో భాగంగా రాయపూర్ వేదికగా జరిగిన ఉత్కంఠ పోరులో ఆర్సీబీ చేతిలో పరాజయం పాలై.. ప్లేఆఫ్స్ రేసు నుంచి అధికారికంగా నిష్క్రమించిన అనంతరం ముంబై ఇండియన్స్ కెప్టెన్ సూర్యకుమార్ యాదవ్ తన స్పందనను తెలియజేశాడు. మ్యాచ్ అనంతరం సూర్య మాట్లాడుతూ.. ఈ సీజన్లో తమకు ఎన్నో పాఠాలు ఎదురయ్యాయని.. పాయింట్ల పట్టికలో అడుగున ఉండటం తమకు అలవాటు లేని విషయమని ఆవేదన వ్యక్తం చేశాడు. ఈ ఓటమిని జీర్ణించుకోవడం కష్టంగా ఉన్నప్పటికీ.. తప్పులను సరిదిద్దుకుని వచ్చే ఏడాది మరింత బలంగా తిరిగి వస్తామని ధీమా వ్యక్తం చేశాడు.

రాజ్ బావా బౌలింగ్‌పై సూర్య స్పందన
చివరి ఓవర్‌ను యువ ఆల్‌రౌండర్ రాజ్ బావాకు ఇవ్వడంపై సూర్య క్లారిటీ ఇచ్చాడు. "రాజ్ బావా గతేడాది నుంచి తన బౌలింగ్‌పై కఠినంగా శ్రమిస్తున్నాడు. ఈ ఏడాది అతను ఓ విభిన్నమైన ఆల్‌రౌండర్‌గా కనిపిస్తున్నాడు. ఆఖరి ఓవర్ బాధ్యతను అతను అద్భుతంగా తీసుకున్నాడు, దాదాపు మాకు విజయాన్ని అందించినంత పని చేశాడు" అని సూర్య కొనియాడాడు. చివరి వరకు పోరాడిన బావాను కెప్టెన్ అభినందించాడు.

అందువల్లే ఓడిపోయాం: సూర్య
ఈ వికెట్‌పై తాము 10 నుంచి 15 పరుగులు తక్కువ చేశామని సూర్య అభిప్రాయపడ్డాడు. సరైన సమయంలో వికెట్లు కోల్పోవడం తమ కొంపముంచిందని తెలిపాడు. అయితే నమన్ ధీర్, తిలక్ వర్మ బ్యాటింగ్‌ను చూస్తే గర్వంగా ఉందని అన్నాడు. "వారిద్దరూ చాలా అద్భుతంగా ఆడారు. మైదానంలో మిగిలిన బ్యాటర్ల కంటే వారు భిన్నమైన ట్రాక్‌పై ఆడుతున్నట్లు అనిపించింది. వారి పోరాటం జట్టుకు చాలా కీలకంగా నిలిచింది" అని యువ ఆటగాళ్లను ఆకాశానికెత్తాడు.

భవిష్యత్ ప్రణాళిక
ఫీల్డింగ్ సమయంలో తిలక్ వర్మ, నమన్ ధీర్ మధ్య జరిగిన మిక్స్-అప్‌పై స్పందిస్తూ.. క్రికెట్‌లో ఇవి సహజమని.. అయితే తిలక్ ఆ తర్వాత పట్టిన క్యాచ్ అద్భుతమని సూర్య అన్నాడు. ఏదో ఒకటి స్పెషల్‌గా చేయాలనే తపన అతనిలో కనిపించిందని పేర్కొన్నాడు. మిగిలిన మ్యాచ్‌ల్లో ఫలితంతో సంబంధం లేకుండా తమకు ఇష్టమైన క్రికెట్‌ను ఆస్వాదిస్తూ, అత్యుత్తమ ప్రదర్శన ఇచ్చేందుకు ప్రయత్నిస్తామని సూర్యకుమార్ యాదవ్ ముగించాడు.