నో-బాల్‌ వేస్తే జేబుకు చిల్లు పడాల్సిందే! బౌలర్లకు ఇక మోతే!!

శ్రీలంక జట్టుతో ఇటీవల ముగిసిన రెండు మ్యాచ్‌ల టెస్ట్ సిరీస్‌లో భారత్ 1-0 తేడాతో సిరీస్ కైవసం చేసుకున్నప్పటికీ.. కొలంబో టెస్టును డ్రాగా ముగించడం వల్ల కీలకమైన వరల్డ్ టెస్ట్ ఛాంపియన్ షిప్ పాయింట్లను కోల్పోవాల్సి వచ్చింది. ఈ మ్యాచ్‌లో భారత బౌలర్లు పదేపదే నో-బాల్స్ వేయడం జట్టు విజయావకాశాలను దెబ్బతీసింది. రవీంద్ర జడేజాతో పాటు అరంగేట్ర స్పిన్నర్ సారాంశ్ జైన్ కూడా ఫ్రంట్ ఫుట్ క్రమశిక్షణ పాటించకపోవడంపై టీమిండియా దిగ్గజ ఆటగాడు సునీల్ గవాస్కర్ తీవ్ర ఆగ్రహం వ్యక్తం చేశారు.

గౌతమ్ గంభీర్ కూతురికి అరుదైన గౌరవం!

మిడ్-డే కాలమ్‌లో సునీల్ గవాస్కర్ రాసుకొస్తూ.. ఫ్రంట్ ఫుట్ లైన్ దాటడం అనేది బౌలర్ చేతిలోనే ఉండే అంశమని పేర్కొన్నారు. స్టేడియంలో టేప్ కొలతతో రనప్ కొలుచుకునే సౌకర్యం ఉన్న ఈ కాలంలో ఓవర్ స్టెప్పింగ్ చేయడానికి ఎలాంటి సాకులు లేవని ఆయన స్పష్టం చేశారు. 2021 నుంచి టెస్టుల్లో రవీంద్ర జడేజా 85కి పైగా నో-బాల్స్ వేయడం గమనించదగ్గ విషయమని.. ఇది తక్షణమే సరిదిద్దుకోవాల్సిన తీవ్రమైన సమస్య అని సునీల్ గవాస్కర్ హెచ్చరించారు.

టెస్టుల్లో నో-బాల్ పడితే 'ఫ్రీ హిట్' ప్రవేశపెట్టాలన్న స్పిన్ బౌలింగ్ కోచ్ సాయిరాజ్ బహుతులే కామెంట్లపై సునీల్ గవాస్కర్ అసహనం వ్యక్తం చేశారు. ఆధునిక టెస్ట్ క్రికెట్లో ఇప్పటికే ఓవర్‌కు రెండు బౌన్సర్ల నిబంధన, చిన్న బౌండరీలు ఉండటం వల్ల బ్యాటర్లకు పరుగులు చేయడం సులభంగా మారిందని.. ఇప్పుడు ఫ్రీ హిట్లు ఇస్తే ఆట సమతుల్యత దెబ్బతింటుందని అభిప్రాయపడ్డారు. ఫ్రీ హిట్ ఇచ్చి బ్యాటర్లకు అదనపు ప్రయోజనం కల్పించకూడదని సూచించారు.

Also Read

Vaibhav Sooryavanshi: కెప్టెన్సీ మ్యాజిక్.. అంపైర్‌కే షాకిచ్చిన బేబీ బాస్! (వీడియో)

దీనికి ప్రత్యామ్నాయంగా బౌలర్లకు ఆర్థిక జరిమానా విధించే విధానాన్ని సునీల్ గవాస్కర్ ప్రతిపాదించారు. ఓ బౌలర్ మొదటి నో-బాల్ వేస్తే ఓ నిర్ణీత మొత్తం, రెండోసారి నో-బాల్ వేస్తే ఆ జరిమానాను రెట్టింపు, మూడోసారి చేస్తే అంతకంటే ఎక్కువ వసూలు చేయాలని సూచించారు. బౌలింగ్ యూనిట్‌లో క్రమశిక్షణ పెరిగేందుకు బౌలర్ కు పడే జరిమానాలో సగం మొత్తాన్ని బౌలింగ్ కోచ్‌కూ విధించాలని కొత్త ఐడియా ఇచ్చారు. ఇలా వసూలైన నిధులతో పర్యటన చివరలో జట్టు సభ్యులందరూ కలిసి ఆస్వాదించే టీమ్ డిన్నర్ ఏర్పాటు చేసుకోవచ్చని వెల్లడించారు.

నో-బాల్స్ మాత్రమే కాకుండా ఫీల్డింగ్‌లో త్రోకి సరిగ్గా బ్యాకప్ ఇవ్వకపోవడం వంటి ఇతర చిన్నపాటి నిర్లక్ష్యాలకు కూడా జరిమానాలు విధించవచ్చని సునీల్ గవాస్కర్ పేర్కొన్నారు. ఈ శిక్షలను జట్టు సభ్యులందరూ సమిష్టిగా ఓటింగ్ ద్వారా నిర్ణయించుకోవడం వల్ల ఒకరికొకరు బాధ్యతాయుతంగా ఉండటంతో పాటు జట్టులో సరదా వాతావరణం, సమైక్యత మరింత పెరుగుతాయని సునీల్ గవాస్కర్ భావిస్తున్నారు.