ఆస్కార్ లెవెల్ యాక్టింగ్: పాక్ క్రికెటర్ కుంటి నడక డ్రామా బట్టబయలు! (వీడియో)

లార్డ్స్ వేదికగా ఇంగ్లాండ్ జట్టుతో జరిగిన రెండో టెస్ట్ మ్యాచ్ లో పాకిస్తాన్ క్రికెట్ జట్టు 194 పరుగుల తేడాతో దారుణ ఓటమిని చవిచూసింది. ఈ ఓటమితో సిరీస్‌లో పాక్ వైఫల్యంపై తీవ్ర స్థాయిలో విమర్శలు వ్యక్తమవుతున్నాయి. బాబర్ ఆజం, మహమ్మద్ రిజ్వాన్ సహా సీనియర్ ఆటగాళ్లందరూ దారుణంగా విఫలమై అభిమానులను నిరాశపరిచారు. అయితే ఈ మ్యాచ్ వేదికగా పాకిస్థాన్ ఓపెనర్ ఇమామ్-ఉల్-హక్ వ్యవహరించిన తీరు ఇప్పుడు అంతర్జాతీయ క్రికెట్లో ఓ పెద్ద వివాదంగా మారింది.

ఫీల్డింగ్ లో తప్పిదాలు.. ఆపై గాయం పేరుతో దూరం
లార్డ్స్ టెస్ట్ తొలి రోజే ఫీల్డింగ్ చేస్తున్న సమయంలో ఇమామ్-ఉల్-హక్ రెండు సులువైన క్యాచ్‌లను నేలపాలు చేశాడు. ఆ తర్వాత కొద్దిసేపటికే ఆయన పిక్క కండరాలు బెణికినట్లు వార్తలు వచ్చాయి. పాక్ మెడికల్ టీమ్ ఆయనను పరీక్షించి.. మ్యాచ్ లోని తదుపరి భాగంలో ఆడలేరని స్పష్టం చేసింది. అయితే జట్టు కష్టాల్లో ఉన్న సమయంలో ఓపెనర్ అందుబాటులో లేకపోవడంపై విమర్శలు మొదలయ్యాయి.

నాలుగో రోజు కుంటి నడక నాటకం?
మ్యాచ్ నాలుగో రోజు ఇమామ్-ఉల్-హక్ హాఫ్ ప్యాంట్ వేసుకుని గాయపడిన కాలికి పెద్ద ఎత్తును టేప్ చుట్టుకుని స్టేడియంలో కనిపించాడు. కెమెరాల కంటికి కనిపించేలా సరిగ్గా మైదానం సరిహద్దుల వద్ద కుంటుతూ ప్రాక్టీస్ చేశాడు. జట్టుకు అవసరమైతే రెండో ఇన్నింగ్స్ లో బ్యాటింగ్ చేయడానికి సిద్ధంగా ఉన్నట్లు చూపుతూ ఆ విజువల్స్ సోషల్ మీడియాలో బాగా వైరల్ అయ్యాయి.

ఇమామ్ నాటకాన్ని బట్టబయలు చేసిన స్టువర్ట్ బ్రాడ్
ఈ దృశ్యాలపై ఇంగ్లాండ్ లెజెండరీ బౌలర్ స్టువర్ట్ బ్రాడ్ తీవ్ర ఆగ్రహం వ్యక్తం చేశారు. స్కై స్పోర్ట్స్ కామెంట్రీలో బ్రాడ్ మాట్లాడుతూ.. "ఇదంతా కేవలం షో మాత్రమే. తప్పులు చేసినందుకు మీడియా, సొంత సహచరుల నుంచి వస్తున్న విమర్శల నుంచి తప్పించుకునేందుకు ఇమామ్ నాటకమాడుతున్నాడు. నిజంగా ప్రాక్టీస్ చేయాలనుకుంటే ఎవరికీ కనపడని ఇండోర్ స్టేడియంలో చేసుకోవచ్చు. కానీ ఇలా షార్ట్స్ వేసుకుని, కాలికి టేప్ చుట్టుకుని అందరి ముందు కుంటుతూ తిరగడం కేవలం సానుభూతి కోసమే" అని తీవ్రంగా మందలించారు.

పాక్ మాజీ చీఫ్ సెలెక్టర్ సంచలన ఆరోపణలు
పాకిస్థాన్ మాజీ ప్రధాన సెలెక్టర్ మహమ్మద్ వసీం కూడా ఇమామ్-ఉల్-హక్ వైఖరిపై సెన్సేషనల్ కామెంట్స్ చేశారు. 2022లో ఇంగ్లండ్ జట్టుతో జరిగిన మ్యాచ్ లోనూ ఇమామ్ ఇలాగే గాయాన్ని నాటకీయంగా వాడుకున్నాడని గుర్తు చేశారు. అధికారిక ప్రకటన రావడానికి ముందే ఇమామ్ గాయం నాటకం ఆడబోతున్నాడని నాటి ఫిజియో తనకు ముందే హెచ్చరించాడని వసీం బయటపెట్టడం వివాదాన్ని మరింత రాజేసింది.

పేక మేడలా కూలిన పాక్ బ్యాటింగ్
ఈ తీవ్ర వివాదాల నడుమ మ్యాచ్‌లో 389 పరుగుల భారీ లక్ష్యంతో బరిలోకి దిగిన పాకిస్థాన్ 194 పరుగులకే ఆలౌట్ అయింది. ఒక దశలో కేవలం 14 పరుగులకే 3 వికెట్లు కోల్పోయి విలవిలలాడింది. సౌద్ షకీల్(97 పరుగులు) ఒంటరి పోరాటం చేసినప్పటికీ.. ఆయన వికెట్ పడగానే మిగతా ఆటగాళ్లు వరుసగా పెవిలియన్ చేరారు. ఈ ఓటమితో 3 టెస్టుల సిరీస్ ను పాకిస్థాన్ మరొక మ్యాచ్ మిగిలుండగానే కోల్పోయింది.