సచిన్ కుమార్తెకు తప్పని వేధింపులు: ముంబై పోలీసుల అదుపులో నిందితుడు

హైదరాబాద్: ప్రముఖుల కుమార్తెలకు కూడా ఆకతాయిల నుంచి వేధింపులు తప్పడం లేదు. తాజాగా క్రికెట్ లెజెండ్ సచిన్ టెండూల్కర్ కుమార్తె సారా టెండూల్కర్‌ను వేధింపులకు గురి చేసిన ఓ వ్యక్తిని ముంబై పోలీసులు ఆదివారం అరెస్ట్ చేశారు.

సచిన్ ఇంట్లోని ల్యాండ్ లైన్‌కు పలుమార్లు ఫోన్ చేసి సారాను వేధించడమే కాకుండా.. కిడ్నాప్‌ కూడా చేస్తానని నిందితుడు బెదిరించినట్టు పోలీసులు తెలిపారు. సారా ఇచ్చిన ఫిర్యాదు మేరకు కేసు నమోదు చేసుకున్న పోలీసులు దేవ్ కుమార్ అనే వ్యక్తిని అదుపులోకి తీసుకున్నారు.

ఇతడు పశ్చిమ బెంగాల్‌కు చెందిన వ్యక్తిగా గుర్తించారు. తనకు సారాతో పెళ్లి చేయకపోతే ఆమెను కిడ్నాప్‌ చేస్తానని సచిన్‌ ఇంటికి ఫోన్‌ చేసి దేవ్ కుమార్ పలుమార్లు బెదిరించాడని పోలీసులు వెల్లడించారు. సచిన్‌ ల్యాండ్ నంబర్‌కు 20 సార్లు ఫోన్‌ చేసినట్లు చెప్పారు. సారా గురించి అతడు అసభ్యంగా మాట్లాడినట్లు తెలిపారు.

ఈ వేధింపులకు సంబంధించి డిసెంబర్‌ 5న బాంద్రా పోలీస్‌ స్టేషన్‌లో కేసు నమోదైంది. సెలిఫోన్‌ టవర్‌ లోకేషన్‌ ఆధారంగా నిందితున్ని పట్టుకున్నారు. దేవ్ కుమార్ మానసికస్థితి సరిగా లేదని, గత కొంతకాలంగా అతడు వింతగా ప్రవర్తిస్తున్నాడని కుటుంబ సభ్యులు పోలీసులకు చెప్పారు. సోమవారం అతన్ని ముంబై కోర్టులో హాజరుపరచనున్నట్లు తెలుస్తోంది.

తెలుగులో అన్ని క్రీడావార్తల కోసం 'మై-ఖేల్ తెలుగు'ను ఫేస్‌బుక్, ట్విటర్ , గూగుల్ ప్లస్‌లో ఫాలో అవ్వండి.