ఆఖరి వన్డే ఆడిన మలింగ.. ఘనంగా వీడ్కోలు పలికిన లంక

చివరి మ్యాచ్‌లో మూడు వికెట్లు:

కొలంబోలోని ప్రేమదాస మైదానంలో బంగ్లాదేశ్‌తో జరిగిన మ్యాచ్‌లో మలింగ (9.4-2-38-3) అద్భుత ప్రదర్శన చేసాడు. మలింగ చివరి మ్యాచ్‌లో మూడు వికెట్లు తీసాడు. బంగ్లా ఓపెనర్లు తమీమ్ ఇక్బాల్, సౌమ్య సర్కార్‌.. ముస్తాఫిజుర్ రెహమాన్ వికెట్లను పడగొట్టాడు. వన్డే కెరీర్ చివరి బంతికి కూడా వికెట్ తీయడం విశేషం. మ్యాచ్ అనంతరం లంక ఆటగాళ్లు ఘనంగా వీడ్కోలు పలికారు.

2004లో వన్డేల్లో అరంగేట్రం:

2004లో వన్డేల్లో అరంగేట్రం చేసిన 35 ఏళ్ల మలింగ 226 వన్డేలు ఆడి 338 వికెట్లు పడగొట్టాడు. శ్రీలంక తరఫున మురళీధరన్ (534), వాస్ (400) తర్వాత అత్యధిక వికెట్లు తీసిన బౌలర్‌గా నిలిచాడు. 2007, 2011 ప్రపంచకప్‌లో శ్రీలంక ఫైనల్‌కు చేరడంలో కీలక పాత్ర పోషించాడు. తన 15 ఏళ్ల వన్డే ప్రయాణంలో ఎన్నో రికార్డులను అందుకున్నాడు.

శ్రీలంక విజయం:

మూడు వన్డేల సిరీస్‌లో భాగంగా బంగ్లాతో జరిగిన తొలి మ్యాచ్‌లో శ్రీలంక 91 పరుగుల తేడాతో గెలిచింది. టాస్ గెలిచి తొలుత బ్యాటింగ్ చేసిన శ్రీలంక 314 పరుగుల భారీ స్కోర్ చేసింది. కుశాల్ పెరీరా (99 బంతుల్లో; 111) సెంచరీ చేసాడు. భారీ లక్ష్య ఛేదనకు దిగిన బంగ్లా 223 పరుగులకే 41.4 ఓవర్లలో ఆలౌటైంది. ముష్ఫికర్‌ రహీమ్‌ (67), సబ్బీర్‌ రహమాన్‌ (60) అర్ధ సెంచరీలు చేశారు. నువాన్‌ ప్రదీప్, మలింగకు మూడు వికెట్లు దక్కాయి.