బ్రుయిన్ రికార్డుల్లోకి.. హెరాత్‌ సైతం అరుదైన ఫీట్‌ తో..

నాలుగో ఇన్నింగ్స్‌లో బ్రుయిన్‌తో పాటుగా:

బ్రుయిన్‌తో పాటుగా శ్రీలంక స్పిన్నర్‌ రంగనా హెరాత్‌ సైతం అరుదైన ఫీట్‌ను సాధించాడు. దక్షిణాఫ్రికా రెండో ఇన్నింగ్స్‌లో హెరాత్‌ 6 వికెట్లతో చెలరేగాడు. దీంతో నాలుగో ఇన్నింగ్స్‌లో అత్యధిక వికెట్లు సాధించిన బౌలర్‌గా రికార్డు నెలకొల్పాడు. అంతే కాకుండా నాలుగో ఇన్నింగ్స్‌లో ఎక్కువ సార్లు 5 కంటె ఎక్కువ వికెట్ల పడగొట్టిన బౌలర్‌ కూడా హెరాతే కావడం విశేషం.

హెరాత్‌ నాలుగో ఇన్నింగ్స్‌లో 115 వికెట్లతో

40 నాలుగో ఇన్నింగ్స్‌లు ఆడిన హెరాత్‌ 115 వికెట్లతో ఈ జాబితాలో తొలిస్థానంలో ఉండగా.. వెస్టిండీస్‌ సీఏ వాల్ష్‌ 39 ఇన్నింగ్స్‌లో 66 వికెట్లు.. భారత స్పిన్నర్‌ రవిచంద్రన్‌ అశ్విన్‌ 17 ఇన్నింగ్స్‌ల్లో 60 వికెట్లతో తరువాతి స్థానాల్లో ఉన్నారు. ఇక హెరాత్‌ నాలుగో ఇన్నింగ్స్‌లో మొత్తం 12 సార్లు 5కు పైగా వికెట్లు సాధించాడు. ఈ జాబితాలో ముత్తయ్య మురళిధరన్, షేన్‌ వార్న్‌ ఏడు సార్లు, అశ్విన్‌ 6 సార్లు తర్వాతి స్థానాల్లో ఉన్నారు.

కెరీర్లో తొలి సెంచరీ పూర్తి చేసుకున్న బ్రుయిన్

దక్షిణాఫ్రికాతో జరిగిన రెండో టెస్టులోనూ శ్రీలంక 199 పరుగుల తేడాతో గెలిచి రెండు టెస్టుల సిరీస్‌ను 2-0తో క్లీన్‌స్వీప్‌ చేసింది. కొలంబో టెస్టులో ఐదు వికెట్ల నష్టానికి 139 పరుగులతో నాలుగో రోజు ఆట ప్రారంభించిన దక్షిణాఫ్రికాను తెంబా బవుమా (98 బంతుల్లో 63), థెయునిస్ డి బ్రుయిన్ (232 బంతుల్లో 101) ఆదుకున్నారు. వీరిద్దరూ ఆరో వికెట్‌కు 123 పరుగులు జోడించారు. కానీ బవుమా అవుటయ్యాక మిగతా బ్యాట్స్‌మెన్ ఎవరూ క్రీజులో నిలవలేకపోయారు. కెరీర్లో తొలి సెంచరీ పూర్తి చేసుకున్న బ్రుయిన్ రంగన హెరాత్‌ బౌలింగ్‌లో అవుటయ్యాడు. చివర్లో బౌలర్లు డేల్ స్టెయిన్, రబాడ కూడా త్వరగా పెవిలియన్ చేరారు.

12వ కెప్టెన్‌గా రికార్డ్ నెలకొల్పిన లక్మల్

దీంతో సఫారీలు 290 పరుగులకు ఆలౌటయ్యారు. శ్రీలంక బౌలర్లలో హెరాత్ 98 పరుగులిచ్చి 6 వికెట్లు పడగొట్టగా.. దిల్‌రువాన్ పెరీరా, అకిల ధనంజయ చెరో రెండో వికెట్లు తీశారు. ఈ మ్యాచ్‌లో లంక పేసర్లు కేవలం రెండు ఓవర్లు మాత్రమే బౌలింగ్ వేశారు. ఆ రెండు ఓవర్లు కూడా కెప్టెన్ లక్మల్ వేయడం విశేషం. ఒక్క పరుగు కూడా చేయకుండా, ఒక్క వికెట్ కూడా తీయకుండా టెస్టు మ్యాచ్‌లో గెలుపొందిన 12వ కెప్టెన్‌గా లక్మల్ రికార్డ్ నెలకొల్పాడు.