క్లీన్ స్వీప్: ఒక్క రాజీనామాతో బోర్డు మొత్తం ఖతం!

శ్రీలంక క్రికెట్‌లో పెను రాజకీయ ప్రకంపనలు మొదలయ్యాయి. శ్రీలంక క్రికెట్ బోర్డు అధ్యక్షుడు శమ్మి సిల్వా బుధవారం తన పదవికి తక్షణమే రాజీనామా చేశారు. ఈ సంచలన నిర్ణయం క్రీడా ప్రపంచంలో ఒక్కసారిగా కలకలం రేపింది. కేవలం అధ్యక్షుడే కాకుండా.. బోర్డులోని కీలక కార్యనిర్వాహక సభ్యులు, ఎగ్జిక్యూటివ్ కమిటీ మొత్తం సామూహికంగా రాజీనామా చేయడం గమనార్హం.

శ్రీలంక క్రికెట్ బోర్డు విడుదల చేసిన అధికారిక ప్రకటన ప్రకారం.. బోర్డు అధ్యక్షుడు శమ్మి సిల్వాతో పాటు ఆఫీస్ బేరర్లు అందరూ తమ రాజీనామా లేఖలను సమర్పించారు. ఈ విషయాన్ని వారు శ్రీలంక అధ్యక్షుడు అనుర కుమార దిస్సానాయకే, క్రీడా శాఖ మంత్రి సునీల్ కుమార గమగేకు అధికారికంగా తెలియజేశారు. అయితే ఇంత మంది ఒక్కసారిగా రాజీనామా చేయడానికి గల స్పష్టమైన కారణాలను శ్రీలంక క్రికెట్ బోర్డు బహిరంగంగా వెల్లడించలేదు.

శ్రీలంక క్రికెట్ బోర్డు అధ్యక్షుడు శమ్మి సిల్వా గత కొంతకాలంగా ఆర్థిక అక్రమాల ఆరోపణలను ఎదుర్కొంటున్నారు. ఈ నేపథ్యంలోనే శ్రీలంక క్రికెట్ అడ్మినిస్ట్రేషన్‌లో భారీ మార్పులు చోటుచేసుకుంటున్నట్లు తెలుస్తోంది. శమ్మి సిల్వా 2019 ఫిబ్రవరిలో మొదటిసారి అధ్యక్షుడిగా బాధ్యతలు చేపట్టారు. అప్పట్లో అవినీతి ఆరోపణలు ఎదుర్కొన్న తిలంగ సుమతిపాల స్థానంలో ఆయన ఎన్నికయ్యారు. వరుసగా నాలుగు సార్లు అధ్యక్షుడిగా పనిచేసిన శమ్మి సిల్వా.. అందులో మూడు సార్లు ఏకగ్రీవంగా ఎన్నికవ్వడం విశేషం.

ప్రస్తుతం శ్రీలంక ప్రభుత్వం క్రికెట్ బోర్డులో ప్రక్షాళన చేపట్టే యోచనలో ఉన్నట్లు సమాచారం. బోర్డులోని ఉన్నత స్థాయి అధికారులంతా వైదొలగడంతో, తదుపరి బాధ్యతలను ఎవరు చేపడతారనేది ఆసక్తికరంగా మారింది. ఐసీసీ నిబంధనల ప్రకారం బోర్డు నిర్వహణలో ప్రభుత్వ జోక్యం ఉండకూడదు, కానీ తాజా పరిణామాలు శ్రీలంక క్రికెట్ భవిష్యత్తుపై నీలి నీడలు కమ్ముకునేలా చేశాయి.