లంక కోచ్, కెప్టెన్, మేనేజర్‌లకు తప్పని సస్పెన్షన్

బాల్‌ ట్యాంపరింగ్‌కు పాల్పడటంతో

వెస్టిండీస్‌ పర్యటనలో బాల్‌ ట్యాంపరింగ్‌కు పాల్పడటంతో పాటు మైదానంలో దిగేందుకు ఆలస్యం చేసి క్రికెట్‌ను అపహాస్యం చేసినందుకు ఐసీసీ... లంక కెప్టెన్ దినేశ్‌ చండిమాల్, కోచ్‌ చండిక హతురుసింఘే, మేనేజర్‌ అసంక గురుసిన్హాలపై సస్పెన్షన్‌ వేటు వేసింది. ఏకంగా నాలుగు వన్డేలు, రెండు టెస్టుల నిషేధం విధించింది.

మైదానంలో దిగేందుకు ససేమిరా

గత నెల సెయింట్‌ లూసియాలో జరిగిన టెస్టులో లంక బంతి ఆకారాన్ని దెబ్బతీసింది. ఫీల్డ్‌ అంపైర్లు బంతిని మారుస్తామన్నందుకు మైదానంలో దిగేందుకు ససేమిరా అన్నారు. చివరకు మ్యాచ్‌ రిఫరీ జవగళ్‌ శ్రీనాథ్‌ జోక్యంతో మ్యాచ్‌ ఆడారు.

వీడియో కాన్ఫరెన్సు ద్వారా ఆరు గంటలు

ఈ మొత్తం ఉదంతంలో తప్పుతేలడంతో ఇదివరకే చండిమాల్‌ టెస్టు మ్యాచ్‌ నిషేధానికి గురయ్యాడు. కాగా... క్రికెట్‌ క్రీడ ఔన్నత్యం కాపాడేందుకు ఐసీసీ చేపట్టిన స్వతంత్ర దర్యాప్తులో క్రీడాస్ఫూర్తికి విఘాతం కలిగించేలా లంక వర్గాలు నడుచుకున్నాయని విచారణ కమిషనర్‌ మైకేల్‌ బిలాఫ్‌ తేల్చారు. దీంతో సోమవారం శిక్ష ఖరారు చేశారు. ఈ నెల 11న వీడియో కాన్ఫరెన్సు ద్వారా ఆరు గంటల పాటు లంక, విండీస్‌ల వాదనలు విన్న ఆయన తీర్పును రిజర్వ్‌లో ఉంచారు.

దక్షిణాఫ్రికాతో ఆడబోయే మ్యాచ్‌లకు

సోమవారం వెలువరించిన తీర్పులో క్రమశిక్షణ ఉల్లంఘించినందుకు వీరిపై 8 చొప్పున సస్పెన్షన్‌ పాయింట్లు విధించింది ఐసీసీ. దీని ప్రకారం ఆరు (4+2) మ్యాచ్‌లు సస్పెండ్‌ అయ్యా రు. దీంతో చండిమాల్‌ ఈ నెల 29, ఆగస్టు 1, 5, 8 తేదీల్లో స్వదేశంలో దక్షిణాఫ్రికాతో జరగబోయే మొదటి నాలుగు వన్డేలు, రెండు టెస్టు మ్యాచ్‌లకు వీళ్లు దూరం కానున్నారు.