శ్రీలంకపై భారత్ ఘోర పరాజయం

దంబుల్లా: శ్రీలంకతో సోమవారం జరిగిన తొలి వన్డే క్రికెట్ మ్యాచ్ లో భారత్ ఘోరంగా ఓడిపోయింది. శ్రీలంక భారత్ పై 8 వికెట్ల తేడాతో విజయం సాధించింది. మొదట రెండు వికెట్లను శ్రీలంక త్వరగానే కోల్పోయినప్పటికీ ఆ తర్వాత నిలకడగా ఆడి ఘనవిజయం సాధించింది. భారత్ తన ముందుంచిన 147 పరుగుల లక్ష్యాన్ని శ్రీలంక సునాయసంగా ఛేదించింది. భారత బ్యాట్సమెన్ వైఫల్యం మరోసారి కొట్టొచ్చినట్లు కనిపించింది. శ్రీలంక బౌలర్ల ముందు భారత బ్యాట్స్ మెన్ ఎవరూ నిలదొక్కులేకపోయారు. 23 పరుగులు చేసిన యువరాజ్ సింగ్ టాప్ స్కోరర్ గా నిలిచాడు. గంభీర్ డకౌట్ కాగా, కోహ్లీ 12 పరుగులు చేశాడు. కెప్టెన్ మహేంద్ర సింగ్ ధోనీ ఆరు పరుగులకే అవుటయ్యాడు. ఓజా 16 పరుగులు చేసి నాటవుట్ గా మిగిలాడు. భారత టాప్ ఆర్డర్ పూర్తిగా విఫలమైంది. 146 పరుగులకే భారత్ ఆలవుట్ అయింది. హర్భజన్, జహీర్ ఖాన్ 12 పరుగులేసి చేశారు.

శ్రీలంక బౌలర్లలో మెండిస్, మురళీథరన్ మూడేసి వికెట్లు తీసుకోగా కులశేఖర 2, వాస్, తుషారా ఒక్కటేసి వికెట్లు తీసుకున్నారు. ఆ తర్వాత బ్యాటింగ్ దిగిన శ్రీలంక చాలా త్వరితంగా మొదటి రెండు వికెట్లను కోల్పోయింది. జయసూర్య 10 పరుగులు చేయగా, సంగక్కర 19 పరుగులు చేశాడు. వీరిద్దరు మునాఫ్ పటేల్ బౌలింగులో అవుటయ్యారు. ఆ తర్వాత జయవర్ధనే, కపుగెదర వికెట్ పడిపోకుండా శ్రీలంకను విజయతీరానికి చేర్చారు. జయవర్థనే 61 పరుగులు చేయగా, కపుగెదర 45 పరుగులు చేశాడు. టెస్టు మ్యాచుల్లో ఘోరంగా ఆడిన భారత బ్యాట్స్ మెన్ వన్డేల్లోనూ అదే తీరు కనబరిచింది.