Aniket Verma: వికెట్లు పడుతున్నా బెదరకుండా విధ్వంసం.. ఎవరీ అనికేత్ వర్మ?

IPL 2025 Aniket Verma: సన్‌రైజర్స్ హైదరాబాద్ విధ్వంసక బ్యాటర్లకు పెట్టింది పేరు. ట్రావిస్ హెడ్, అభిషేక్ శర్మ, ఇషాన్ కిషన్, హెన్రిచ్ క్లాసెన్ వంటి స్టార్ బ్యాటర్లు హైదరాబాద్ జట్టులో ఉన్నారు. ఈ బ్యాటింగ్ లైనప్ చూసి ఏ బౌలింగ్ యూనిట్ అయినా ఆశ్చర్యపోక తప్పదు. అయితే ఈ కీలక బ్యాటర్లు ఢిల్లీ క్యాపిటల్స్ పై విఫలమయ్యారు. కానీ యువ ఆటగాడు అనికేత్ వర్మ విధ్వంసం సృష్టించాడు. వైజాగ్ వేదికగా జరిగిన ఈ మ్యాచ్ లో అభిమానులను తన ఆటతో ఆకట్టుకున్నాడు. ఎంత పెద్ద స్టార్ బ్యాటర్లు ఉన్నప్పటికీ తన సత్తా ఏంటో నిరూపించుకున్నాడు. ఢిల్లీ ముందు హైదరాబాద్ బ్యాటింగ్ యూనిట్ మొత్తం విఫలమైనా.. అనికేత్ ఢిల్లీ బౌలర్లను చిత్తు చేశాడు.

41 బంతుల్లో 74 పరుగులు
ఐదో స్థానంలో బ్యాటింగ్ కు వచ్చిన అనికేత్ వర్మ ఢిల్లీ క్యాపిటల్స్ పై 41 బంతుల్లో 180.49 స్ట్రైక్ రేట్ తో 74 పరుగులు చేశాడు. అనికేత్ తన ఇన్నింగ్స్ లో 5 ఫోర్లు, 6 సిక్సర్లు బాదాడు. ఢిల్లీపై స్వేచ్ఛగా ఆడిన బ్యాటర్లలో ఒకే ఒక్కడు అనికేత్ వర్మ. అనికేత్ వర్మ ఎవరు? అతని గురించి తెలుసుకుందాం.

అనికేత్ వర్మ ఎవరు?
అనికేత్ వర్మ ఉత్తరప్రదేశ్‌లోని ఝాన్సీలో జన్మించాడు. అనికేత్ వర్మ తన బాల్యంలో చాలా కష్టాలను ఎదుర్కొన్నాడు.అనికేత్ వర్మ మూడేళ్ల వయస్సులోనే అతని తల్లి చనిపోయింది. అతని మామ అమిత్ వర్మ అతడిని పెంచాడు. అతడికి క్రికెట్ అంటే చాలా ఇష్టం. అనికేత్ నంద్జీత్ సర్ మార్గదర్శకత్వంలో రైల్వే యూత్ క్రికెట్ క్లబ్‌లో శిక్షణ పొందాడు. దీని తరువాత, అతను అంకుర్ అకాడమీలో జ్యోతిప్రకాష్ త్యాగి నుంచితన క్రికెట్ నైపుణ్యాలను మరింత మెరుగుపరుచుకున్నాడు. ప్రస్తుతం అనికేత్ వర్మ ఫెయిత్ క్రికెట్ క్లబ్‌లో శిక్షణ పొందుతున్నాడు.

అనికేత్ దేశీయ క్రికెట్ టోర్నమెంట్లలో తనదైన ముద్ర వేశాడు. మధ్యప్రదేశ్ ప్రీమియర్ లీగ్ లో ఒక టీ20 మ్యాచ్ లో అత్యధిక పరుగులు చేసిన ఆటగాడిగా నిలిచాడు. భోపాల్ లెపార్డ్స్ తరఫున ఆడుతున్నప్పుడు ఆరు మ్యాచ్ లలో 273 పరుగులు చేసి చాలా మంచి ప్రదర్శన ఇచ్చాడు. ఈ ప్రదర్శనల కారణంగానే అతనికి ఐపీఎల్ లో ఆడే అవకాశం లభించింది.

ఐపీఎల్ ట్రయల్స్ సమయంలో అనికేత్ తన నిర్భయమైన బ్యాటింగ్ తో సన్‌రైజర్స్ హైదరాబాద్ (SRH) యాజమాన్యాన్ని ఆకట్టుకున్నాడు. అనికేత్ ఆరు ఓవర్ల పవర్‌ప్లే ప్రాక్టీస్‌లో 72 పరుగులు,ఎనిమిది ఓవర్ల ఛేజింగ్‌లో 64 పరుగులు చేశాడు అందుకే అతన్ని మెగా వేలంలో రూ. 30 లక్షలకు కొనుగోలు చేశారు.