కేప్‌టౌన్‌లో 3వ టీ20: కోహ్లీ.. ధోనిలు.. రికార్డులు బద్దలు కొట్టేనా?

టీ20ల్లో రెండు వేల పరుగులు చేసిన ఇద్దరు క్రికెటర్లు

మార్టిన్‌ గుప్టిల్‌ 75 మ్యాచ్‌ల్లో 34.40 యావరేజితో 2,271 పరుగులు సాధించగా, బ్రెండన్‌ మెక్‌కల్లమ్‌ 71 మ్యాచ్‌ల్లో 35.66 సగటుతో 2,140 పరుగులతో ఈ ఘనత సాధించాడు. కివీస్ బ్యాట్స్‌మెన్లు ఇద్దరూ టీ20ల్లో రెండేసి సెంచరీలు చేశారు. అయితే టీ20ల్లో కోహ్లీకి సెంచరీ చేసే అవకాశం రాలేదు. టీ20ల్లో కోహ్లీ ఇప్పటి వరకు 18 హాఫ్ సెంచరీలు మాత్రమే చేశాడు.

కోహ్లీ ఖాతాలో మరో రికార్డు

ప్రస్తుతం కోహ్లీ 57 టీ20ల్లో 50.85 సగటుతో 1,983 పరుగులు సాధించాడు. అంతేకాదు ఈ సిరిస్‌లో కోహ్లీ ఖాతాలో మరో రికార్డు చేరనుంది. ఇంకా 129 పరుగులు సాధిస్తే ఒక పర్యటనలో వెయ్యి పరుగుల్ని సాధించిన రెండో క్రికెటర్‌గా కోహ్లీ నిలుస్తాడు. గతంలో విండిస్ దిగ్గజ క్రికెటర్‌ వివ్ రిచర్డ్స్‌ ఒక్కడే ఒక పర్యటనలో వెయ్యి పరుగుల్ని పూర్తి చేసిన క్రికెటర్‌గా ఉన్నాడు.

ఒక పర్యటనలో వెయ్యి పరుగులు చేసిన వివ్ రిచర్డ్స్

1976లో ఇంగ్లండ్‌ పర్యటనలో నాలుగు టెస్టులు, మూడు టెస్టులు ఆడిన వివ్ రిచర్డ్స్‌ 1,045 పరుగులు సాధించాడు. అంతకుముందు డాన్‌ బ్రాడ్‌మన్‌ ఒక పర్యటనలో వెయ్యి పరుగులను పూర్తి చేయడానికి కేవలం 26 పరుగుల దూరంలో నిలిచిపోయాడు.

మరో క్యాచ్ అందుకుంటే తొలి వికెట్‌ కీపర్‌గా ధోని రికార్డు

ఇక, వికెట్ కీపర్ ధోని విషయానికి వస్తే అంతర్జాతీయ టీ20ల్లో వికెట్‌ కీపర్‌గా 49 క్యాచ్‌లను అందుకున్నాడు. కేప్‌టౌన్‌ వేదికగా జరిగే టీ20లో మరో క్యాచ్‌ అందుకుంటే 50 క్యాచ్‌లు అందుకున్న తొలి వికెట్‌ కీపర్‌గా రికార్డు సృష్టిస్తాడు. 32 క్యాచ్‌లు అందుకుని వెస్టిండీస్‌ వికెట్‌ కీపర్‌ రామ్‌దిన్ ధోని తర్వాతి స్థానంలో ఉండగా, మూడో స్థానంలో 30 క్యాచ్‌లతో సఫారీ కీపర్‌ డికాక్‌ ఉన్నాడు