రెండో వార్మప్ మ్యాచులోనూ ఆస్ట్రేలియా ఓటమి, దక్షిణాఫ్రికా గెలుపు

బెంగళూరు: వరుసగా రెండో ప్రాక్టీస్‌ మ్యాచ్‌లోనూ ఆస్ట్రేలియా ఓటమి పాలైంది. మంగళవారం దక్షిణాఫ్రికా 7 వికెట్ల తేడాతో ఆసీస్‌ను చిత్తు చేసింది. 218 పరుగుల లక్ష్యాన్ని దక్షిణాఫ్రికా 44.2 ఓవర్లలో 3 వికెట్లు కోల్పోయి అలవోకగా ఛేదించింది. స్మిత్‌ (65 రిటైర్డ్‌ ఔట్‌), ఆమ్లా (60 రిటైర్డ్‌ ఔట్‌) రాణించారు. ఆసీస్‌ బౌలర్లు ఒక్క వికెట్‌ కూడా పడగొట్టలేకపోయారు. మిగతా బ్యాట్స్‌మెన్‌కు అవకాశమిచ్చేందుకు ఇద్దరు రిటైర్‌ కాగా ఒకరు (ప్లెసిస్‌) రనౌటయ్యారు. మొదట స్టెయిన్‌ (3/21), పీటర్సన్‌ (3/45) ధాటికి ఆసీస్‌ 47.1 ఓవర్లలో 217 పరుగులకు ఆలౌటైంది. మైకెల్‌ క్లార్క్‌ (73) టాప్‌ స్కోరర్‌.

ఆస్ట్రేలియా ఇన్నింగ్స్‌: 217 ( వాట్సన్‌ 0, హడిన్‌ 0, పాంటింగ్‌ 55, క్లార్క్‌ 73, వైట్‌ 22, డేవిడ్‌ హసి 7; స్టెయిన్‌ 3/21, పీటర్సన్‌ 3/35)

దక్షిణాఫ్రికా ఇన్నింగ్స్‌: 218/3 (స్మిత్‌ 65, ఆమ్లా 60, ప్లెసిస్‌ 12, డుమిని 47 నాటౌట్‌, డివిలియర్స్‌ 16 నాటౌట్‌)

జింబాబ్వేపై ఐర్లాండ్‌ గెలుపు: నాగ్‌పూర్‌లో జరిగిన మ్యాచ్‌లో ఐర్లాండ్‌ 4 వికెట్ల తేడాతో జింబాబ్వేను ఓడించింది. మొదట బ్యాటింగ్‌ చేసిన జింబాబ్వే 8 వికెట్లకు 244 పరుగులు సాధించింది. కెప్టెన్‌ చిగుంబుర (103 నాటౌట్‌) సెంచరీ కొట్టాడు. లక్ష్యాన్ని ఐర్లాండ్‌ 49.3 ఓవర్లలో 6 వికెట్లు కోల్పోయి ఛేదించింది. బోథా (79), ఓబ్రైన్‌ (62 నాటౌట్‌) అర్ధసెంచరీలు చేశారు.

కెన్యాకు షాక్‌: కొలంబోలో జరిగిన మ్యాచ్‌లో నెదర్లాండ్స్‌ 2 వికెట్ల తేడాతో కెన్యాను ఓడించింది. డష్‌చేట్‌ (98 నాటౌట్‌) చెలరేగడంతో 264 పరుగుల లక్ష్యాన్ని నెదర్లాండ్స్‌ 49.1 ఓవర్లలో 8 వికెట్లు కోల్పోయి ఛేదించింది. వాటర్స్‌ (126 నాటౌట్‌) సెంచరీ బాదడంతో కెన్యా మొదట 5 వికెట్లకు 263 పరుగులు సాధించింది.