15 ఏళ్ల కుర్రాడికి అంత సీన్ ఉందా?: మాజీ క్రికెటర్ షాకింగ్ కామెంట్స్

భారత క్రికెట్ జట్టు మాజీ కెప్టెన్ సౌరవ్ గంగూలీ, 15 ఏళ్ల విధ్వంసకర బ్యాట్స్‌మెన్ వైభవ్ సూర్యవంశీ భవిష్యత్తుపై కీలక అంచనా వేశాడు. వైభవ్ సూర్యవంశీని వెంటనే T20 జట్టులోకి తీసుకోవాలని సూచించిన ఆయన, టెస్ట్ ఫార్మాట్‌కు మాత్రం అతడింకా సిద్ధంగా లేడని అభిప్రాయపడ్డాడు.

'వండర్ బాయ్'గా పేరుపొందిన 15 ఏళ్ల వైభవ్ సూర్యవంశీ తన ధాటిగా బ్యాటింగ్‌తో అభిమానులను ఆకట్టుకుంటున్నాడు. ప్రస్తుతం, 2026 ఇండియన్ ప్రీమియర్ లీగ్‌లో రాజస్థాన్ రాయల్స్ తరఫున ఆడుతున్న వైభవ్, లీగ్ దశలో 500కు పైగా పరుగులు సాధించాడు. అతని అద్భుతమైన ప్రదర్శనతో, చాలా మంది క్రికెట్ విశ్లేషకులు అతడిని భారత జట్టులోకి తీసుకోవాలని సూచిస్తున్నారు. ముఖ్యంగా T20 జట్టులో అతడిని త్వరగా చేర్చాలని పలువురు నిపుణులు అభిప్రాయపడుతున్నారు.

ఈ చర్చల మధ్యే, టీమిండియా మాజీ సారథి సౌరవ్ గంగూలీ సైతం వైభవ్ సూర్యవంశీ భవిష్యత్తుపై తన అభిప్రాయాన్ని వెల్లడించాడు. 'టైమ్స్ ఆఫ్ ఇండియా'కు ఇచ్చిన ఇంటర్వ్యూలో గంగూలీ మాట్లాడుతూ, వైభవ్ భారత T20 జట్టుకు సరైన ఎంపిక అని, అయితే టెస్ట్ జట్టులోకి అతడిని ఎంపిక చేయడం తొందరపాటవుతుందని పేర్కొన్నాడు

వైభవ్ సూర్యవంశీ జాతీయ జట్టు ఎంపిక గురించి అడిగినప్పుడు, గంగూలీ ఇలా అన్నాడు: "T20 లో అతడిని వెంటనే తీసుకోవాలి, కానీ టెస్ట్ క్రికెట్‌లో మాత్రం ఇప్పుడే కాదు. టెస్ట్ జట్టులో స్థానం సంపాదించుకోవాలంటే అతడు ఫస్ట్-క్లాస్ క్రికెట్‌లో ఇంకా పరుగులు చేయాలి. అయితే, ప్రస్తుతం అతడు నిజంగానే అద్భుతమైన ప్రతిభను కలిగి ఉన్నాడు. ప్రపంచంలోని ఏ బౌలర్‌నైనా 15 ఏళ్ల కుర్రాడు ఇలా ధీటుగా ఎదుర్కోవడం అద్భుతం. అతడు భారతదేశ భవిష్యత్తు."

ఇక ఆఫ్ఘనిస్తాన్‌తో జరగనున్న టెస్ట్ సిరీస్‌కు ఆకిబ్ నబీని ఎంపిక చేయకపోవడంపై కూడా గంగూలీ స్పందించాడు. "అతడు టోర్నమెంట్‌లో అద్భుతమైన బౌలింగ్ చేశాడు. అయితే, ప్రిన్స్ యాదవ్ కూడా ప్రతిభావంతుడు, అతనికి మంచి వేగం ఉంది" అని నబీ గురించి గంగూలీ తెలిపాడు."సెలెక్టర్లు ప్రిన్స్‌కు అవకాశం కల్పించడం అద్భుతమైన పని అని నేను భావిస్తున్నాను. ఎందుకంటే, ఒకసారి మీకు వేగం ఉంటే, మీరు అతడిని కేవలం ఫస్ట్-క్లాస్ క్రికెట్‌కే పరిమితం చేయలేరు" అని గంగూలీ వివరించాడు అయినప్పటికీ, తన అభిప్రాయం ప్రకారం, "వీరిద్దరినీ ఎంపిక చేసి ఉండాల్సింది" అని గంగూలీ స్పష్టం చేశాడు.