No. 4లో పుజారా: నా మాటలు చాలా మందికి ఆశ్చర్యం కలిగించొచ్చన్న గంగూలీ

నాలుగో స్థానంలో ఆడే ఆటగాడిపై సందిగ్ధత

తాజాగా స్వదేశంలో ఆస్ట్రేలియాతో జరిగిన ఐదు వన్డేల సిరీస్‌ అనంతరం మళ్లీ నాలుగో స్థానంలో ఆడే ఆటగాడిపై సందిగ్ధం ఏర్పడింది. దీంతో మళ్లీ No. 4పై చర్చ మొదలైంది. ఈ నేపథ్యంలో మాజీ కెప్టెన్‌ గంగూలీ ఓ ఆశ్చర్యకర సూచన చేశాడు. పుజారాను ప్రపంచకప్‌కు ఎంపిక చేసి, అతణ్ని నాలుగో స్థానంలో ఆడిస్తే బాగుంటుందని అన్నాడు.

నా మాటలు చాలా మందికి ఆశ్చర్యం కలిగించొచ్చు

"నా మాటలు చాలా మందికి ఆశ్చర్యం కలిగించొచ్చు. నా సూచనకు వాళ్లు నవ్వొచ్చు కూడా. నా వరకైతే ‘నంబర్‌ 4'కు పుజారా చక్కగా సరిపోతాడు. ఫీల్డింగ్‌లో అతడు మరీ చురుకు కాదని తెలుసు కానీ మంచి బ్యాట్స్‌మన్‌. నా మాటలతో కొందరు దిగ్భ్రాంతికి గురవుతారని నాకు తెలుసు" అని గంగూలీ చెప్పుకొచ్చాడు.

పుజారా నాణ్యమైన బ్యాట్స్‌మన్‌

"కానీ, టీమిండియా ప్రయత్నించిన ప్రత్యామ్నాయాలతో పోలిస్తే పుజారా నాణ్యమైన బ్యాట్స్‌మన్‌. కొన్నిసార్లు వన్డే క్రికెట్‌లో పటిష్టత అవసరమైనప్పుడు పుజారా ఆ కొరత తీరుస్తాడు. ముఖ్యంగా జట్టులోని టాప్‌-3 బ్యాట్స్‌మెన్‌కు టన్నుల కొద్దీ పరుగులు చేసే సత్తా ఉన్నప్పుడు అతడు జట్టులో చక్కగా ఇమిడిపోతాడు" అని గంగూలీ చెప్పాడు.

ద్రవిడ్‌ పోషించిన పాత్రలో ఇప్పుడు పుజారా

ఒకప్పుడు భారత వన్డే జట్టులో రాహుల్ ద్రవిడ్‌ పోషించిన పాత్రలో ఇప్పుడు పుజారా సరిగ్గా సరిపోతాడని గంగూలీ చెప్పాడు. కాగా, మే30 నుంచి ఇంగ్లాండ్ వేదికగా వన్డే వరల్డ్‌కప్ జరగనుంది. ఈ మెగా టోర్నీలో మొత్తం పది జట్లు పాల్గొంటున్నాయి. ఈసారి వరల్డ్ కప్ రౌండ రాబిన్ పద్ధతిలో జరగనుంది.