ఈడెన్‌లో తొలి సెంచరీ, కెరీర్ కోసం సాధారణ వ్యక్తుల్లాగా రైళ్లలో: ఎవరీ ఆర్యమన్ బిర్లా?

ఐపీఎల్ 2019 కోసం డిసెంబర్ నెలలో వేలం

ఐపీఎల్ 2019 కోసం డిసెంబర్ నెలలో వేలం నిర్వహించనున్నారు. దీంతో వచ్చే సీజన్ కోసం ఫ్రాంఛైజీలు ఇప్పటి నుంచే తమ కసరత్తులను ముమ్మరం చేసాయి. నవంబర్ 15లోగా ఫ్రాంచైజీలు తాము రిటైన్ చేసుకున్న ఆటగాళ్ల జాబితాను అందించాలని ఐపీఎల్ నిర్వాహకులు సూచించడంతో ఫామ్‌లో లేని ఆటగాళ్లందరినీ ఫ్రాంచైజీలు విడుదల చేశాయి.

ఆర్యమన్ బిర్లాను అట్టిపెట్టుకున్న రాజస్థాన్ రాయల్స్

ఈ క్రమంలో రాజస్థాన్ రాయల్స్ జట్టు ఆర్యమన్ బిర్లాను అట్టిపెట్టుకుంది. ఈ నేపథ్యంలో హిందూస్థాన్ టైమ్స్‌కు ఇచ్చిన ఇంటర్యూలో ఆర్యమన్ బిర్లా మాట్లాడుతూ "ఈ సెంచరీ నాకు ఎంతో అద్భుతమైనది. 69 పరుగులకే 3 వికెట్లు కోల్పోయి కష్టాల్లో ఉన్న సమయంలో క్రీజులోకి వచ్చా. కోల్‌కతాతో మా కుటుంబానికి విడదీయరాని అనుబంధం ఉంది. మా నాన్న ఇక్కడే పుట్టారు. నా చిన్నప్పటి నుంచి ఇక్కడికి వస్తునే ఉన్నా. ఈడెన్ గార్డెన్స్‌లో నా తొలి ఫస్ట్ క్లాస్ సెంచరీ చేయడం ఓ గొప్ప అనుభూతి" అని అన్నారు.

ఇంటి పేరు వల్ల తనపై ఒత్తిడి ఏమీ లేదన్న ఆర్యమన్

అంతేకాదు బిర్లా అనే ఇంటి పేరు వల్ల తనపై ఒత్తిడి ఏమీ లేదని ఆర్యమన్‌ అన్నాడు. "ఇంటి పేరు వల్ల నాపై ఒత్తిడి ఉంటుందని కొంతమంది అంటుంటారు. అవును ఆ పేరుకు ఉన్న గొప్పదనం అలాంటిది. ఇప్పుడు నాకిష్టమైన క్రికెట్‌లో గొప్ప పేరు సాధించి ఆ ఖ్యాతిని అలాగే కొనసాగించాలని అనుకుంటున్నా" అని ఆర్యమన్ చెప్పాడు.

నా ధ్యాసంతా 22 గజాల పిచ్‌ గురించే

"బిర్లా కుటుంబం నుంచి వచ్చినా కూడా ఆడేటపుడు నా దృష్టంతా బంతి మీదే ఉంటుంది. 22 గజాల పిచ్‌ గురించే నా ధ్యాసంతా. అలాంటి కుటుంబంలో పుట్టినందుకు నేను చాలా అదృష్టవంతుణ్ని. నా కుటుంబ సభ్యులే నాకు స్ఫూర్తి ప్రదాతలు. కుటుంబంలో ప్రతి ఒక్కరు వాళ్లు ఎంచుకున్న రంగంలో శ్రమపడుతూనే ఉన్నారు" అని తెలిపాడు.

గత నాలుగేళ్లుగా ప్రొఫెషనల్‌ క్రికెట్‌ ఆడుతున్నా

ఇక, ముంబైలో పుట్టినప్పటికీ మధ్య ప్రదేశ్ తరుపున ఆడటానికి ఓ కారణం ఉందని చెప్పాడు. విపరీతమైన పోటీ ఉండే ముంబైలో ఆశించిన స్థాయిలో అవకాశాలు రాకపోవడంతో తాను మధ్యప్రదేశ్‌కు ఆడాలని నిర్ణయించుకున్నట్లు తెలిపాడు. "గత నాలుగేళ్లుగా ప్రొఫెషనల్‌ క్రికెట్‌ ఆడుతున్నా. ముంబైలో సరైన అవకాశాలు రాకపోవడంతో మధ్యప్రదేశ్‌కు వచ్చేశా. అండర్‌-23 స్థాయిలో మంచి ప్రదర్శన చేసి రంజీ జట్టుకు ఎంపికయ్యా" అని అన్నాడు.