స్మృతి కంటే ముందు ఆ స్టార్ ప్లేయర్ ఎంగేజ్మెంట్ కూడా రద్దయింది!

భారత మహిళా క్రికెట్ జట్టు వైస్ కెప్టెన్ స్మృతి మంధాన, పలాష్ ముచ్చల్ వివాహం రద్దయిన వార్త అందరి దృష్టిని ఆకర్షించింది. నవంబర్ 23న జరగాల్సిన వీరి వివాహం స్మృతి మంధాన తండ్రి అస్వస్థత కారణంగా వాయిదా పడింది. ఆ తర్వాత పలాష్ ముచ్చల్‌కు సంబంధించిన వివిధ కథనాలు బయటకు రావడంతో చివరకు వారిద్దరి వివాహ బంధం తెగిపోయింది. అయితే భారత క్రీడా ప్రపంచంలో నిశ్చితార్థం తర్వాత పెళ్లి ఆగిపోవడం ఇదే మొదటిసారి కాదు. అంతకుముందు ప్రముఖ టెన్నిస్ స్టార్ సానియా మీర్జా కూడా వివాహానికి ముందే తన నిశ్చితార్థాన్ని రద్దు చేసుకోవాలనే కఠిన నిర్ణయం తీసుకున్నారు.

షోయబ్ మాలిక్‌కు ముందు సానియా నిశ్చితార్థం ఎవరితో?
సానియా మీర్జా పాకిస్తాన్ మాజీ క్రికెటర్ షోయబ్ మాలిక్‌ను వివాహం చేసుకున్న విషయం తెలిసిందే. కానీ అంతకుముందు 2009లో సానియా మరొకరితో నిశ్చితార్థం చేసుకున్నారు. ఈ విషయం చాలా తక్కువ మందికి మాత్రమే తెలుసు. 2009 జులై 10న కుటుంబ సభ్యులు సన్నిహితుల మధ్య ఓ ప్రైవేట్ వేడుకలో ఈ నిశ్చితార్థం జరిగింది. కేవలం ఆరు నెలల్లోనే వారిద్దరి బంధం ముగిసింది. తాము ఒకరికొకరం సరిపోమని గ్రహించిన సానియా మీర్జా.. ఆమె కాబోయే భర్త పరస్పర అంగీకారంతో ఈ నిశ్చితార్థాన్ని రద్దు చేసుకున్నారు.

ఎవరు ఆ సోహ్రాబ్ మీర్జా?
సానియా మీర్జా నిశ్చితార్థం రద్దు చేసుకున్న వ్యక్తి పేరు సోహ్రాబ్ మీర్జా. సోహ్రాబ్ మీర్జా హైదరాబాద్‌లోని ప్రసిద్ధ బేకరీ చైన్ అయిన "యూనివర్సల్ బేకర్స్" యజమాని ఆదిల్ మీర్జా కుమారుడు. సానియా, సోహ్రాబ్‌లు ఒకరికొకరు కొత్తేమీ కాదు. వారిద్దరూ చిన్నప్పటి నుంచే పరిచయం. ఇద్దరూ హైదరాబాద్‌లోని సెయింట్ మేరీస్ కాలేజీలో చదువుకున్నారు. సోహ్రాబ్, సానియా కంటే కేవలం ఒక్క సంవత్సరం మాత్రమే పెద్దవాడు.

నిశ్చితార్థం ఎందుకు రద్దయింది?
సోహ్రాబ్ మీర్జా అప్పట్లో ఈ విషయంపై స్పందిస్తూ.. ఎంగేజ్మెంట్ జరిగిన ప్రారంభం నుంచే తమ ఇద్దరి మధ్య అభిప్రాయభేదాలు ఉన్నాయని తెలిపారు. తమ కుటుంబాలు మూడు తరాలుగా స్నేహితులుగా ఉన్నప్పటికీ.. ఆరేళ్లుగా ఒకరికొకరు తెలిసినప్పటికీ.. నిశ్చితార్థం తర్వాత తాము భార్యాభర్తలుగా సరిపోమని గ్రహించామని ఆయన చెప్పారు. ఈ సంబంధం ముందుకు సాగదని సోహ్రాబ్‌కు అర్థమైపోవడంతో హఠాత్తుగా కాకుండా, ఆలోచించి ఈ నిర్ణయం తీసుకున్నారు.

ఆ తర్వాత సానియా మీర్జా షోయబ్ మాలిక్‌ను కలుసుకుని డేటింగ్ చేసి 2010లో వివాహం చేసుకున్నారు. 14 సంవత్సరాల పాటు కలిసి ఉన్న తరువాత, ఈ జంట విడాకులు తీసుకున్నారు. వారికి ఇజాన్ అనే కుమారుడు ఉన్నాడు. అతను ప్రస్తుతం సానియాతో దుబాయ్‌లో ఉంటున్నాడు. మరోవైపు షోయబ్ మాలిక్ నటి సనా జావేద్‌ను వివాహం చేసుకున్నారు.