పెళ్లి రద్దుపై పలాష్ ముచ్చల్ రియాక్షన్ ఇదే..!

భారత మహిళా క్రికెటర్ స్మృతి మంధాన తన వివాహాన్ని రద్దు చేసిన తర్వాత సంగీత దర్శకుడు పలాష్ ముచ్చల్ స్పందించారు. స్మృతి మంధాన-పలాష్ ముచ్చల్ వివాహం వాస్తవానికి నవంబర్ 23న జరగాల్సి ఉండగా.. స్మృతి మంధాన తండ్రి అనారోగ్యంతో ఆస్పత్రిలో చేరడంతో వాయిదా పడింది. పలాష్ ముచ్చల్ కూడా ఆరోగ్య సమస్య కారణంగా ఆస్పత్రిలో చేరి తర్వాత డిశ్చార్జ్ అయ్యారు. నేడు(డిసెంబర్ 7) స్మృతి మంధాన ఇన్‌స్టాగ్రామ్‌లో పలాష్ ముచ్చల్‌తో తన వివాహం రద్దయినట్లు ప్రకటించారు.

స్మృతి ఇన్‌స్టా వేదికగా స్పందిస్తూ.. "గత కొన్ని వారాలుగా నా జీవితంపై ఎన్నో వదంతులు వస్తున్నాయి. నా పెళ్లి క్యాన్సిల్ అయిందని క్లారిటీ ఇస్తున్నా. నేను ఈ విషయాన్ని ఇంతటితో వదిలేస్తున్నా. మీరూ నాలాగే వదలేయండి. ఇరు కుటుంబాల ప్రైవసీని గౌరవించాలని విజ్ఞప్తి చేస్తున్నా. ఇండియా తరఫున ఎన్నో ట్రోఫీలు గెలవడమే నా లక్ష్యం" అని స్మృతి మంధాన ఇన్‌స్టా వేదికగా పోస్ట్ చేశారు. తన దృష్టి అంతా క్రికెట్‌పైనే ఉంటుందని, దేశానికి అత్యున్నత స్థాయిలో ప్రాతినిధ్యం వహించడం తన ప్రధాన లక్ష్యమని మంధాన ముగించింది.

స్పందించిన పలాష్ ముచ్చల్
క్రికెటర్ స్మృతి మంధాన తన వివాహాన్ని రద్దు చేసిన తర్వాత సంగీత దర్శకుడు పలాష్ ముచ్చల్ స్పందించారు. తన వ్యక్తిగత సంబంధం నుంచి ముందుకు సాగాలని నిర్ణయించుకున్నట్లు పలాష్ తెలిపారు. అలాగే తనపై తప్పుడు, పరువు నష్టం కలిగించే కంటెంట్‌ను వ్యాప్తి చేస్తూ తనను అప్రతిష్టపాలు చేస్తున్న వారిపై చట్టపరమైన చర్యలు తీసుకుంటానని హెచ్చరించారు. ఈ కష్టకాలం తన జీవితంలో అత్యంత కష్టమైన దశ అని పేర్కొంటూ.. తన వ్యక్తిగత సంబంధం నుంచి తాను ముందుకు సాగాలని నిర్ణయించుకున్నట్లు తెలిపారు.

పలాష్ ఇన్‌స్టాగ్రామ్ స్టోరీ సారాంశం:
"నేను నా జీవితంలో ముందుకు సాగాలని, నా వ్యక్తిగత సంబంధం నుంచి వైదొలగాలని నిర్ణయించుకున్నాను. నాకు అత్యంత పవిత్రమైన విషయంపై నిరాధారమైన పుకార్లకు ప్రజలు ఇంత సులభంగా స్పందించడం నాకు చాలా కష్టంగా ఉంది. ఇది నా జీవితంలో అత్యంత కష్టమైన దశ, నేను నా నమ్మకాలను కాపాడుకుంటూ దీన్ని ఎదుర్కొంటాను. ప్రతి ఒక్కరూ ధ్రువీకరించని గాసిప్‌ల ఆధారంగా ఇతరులను అంచనా వేయడానికి ముందు ఒకసారి ఆలోచించడం నేర్చుకోవాలని నేను నిజంగా ఆశిస్తున్నాను. మన మాటలు మనకు తెలియని విధంగా ఇతరులను గాయపరచవచ్చు. నాపై తప్పుడు, పరువు నష్టం కలిగించే కంటెంట్‌ను వ్యాప్తి చేస్తున్న వారిపై నా బృందం కఠినమైన చట్టపరమైన చర్యలు తీసుకుంటుంది. ఈ కష్ట సమయంలో దయతో నాకు అండగా నిలిచిన ప్రతి ఒక్కరికీ ధన్యవాదాలు," అని పలాష్ ముచ్చల్ పేర్కొన్నారు.