మ్యాక్స్‌వెల్‌ సేవల్ని వృథా చేస్తున్నారు: ఏడో స్థానంలో ఆడించడంపై బోర్డర్

మాక్స్‌వెల్‌ను ఏడో స్థానంలో

సాధారణంగా మాక్స్‌వెల్‌ను సందర్భాన్ని బట్టి మూడు, నాలుగు, ఐదు స్థానాల్లో జట్టు మెనేజ్‌మెంట్ ఆడిస్తూ ఉంటుంది. అయితే, సిడ్నీ వేదికగా జరిగిన తొలి వన్డేలో మాత్రం మాక్స్‌వెల్‌ను ఏడో స్థానంలో ఆడించారు. ఏడో స్థానంలో ఆడిన అతడు కేవలం ఐదు బంతుల్ని మాత్రమే ఎదుర్కొని 11 పరుగులు చేశాడు.

మంచి ఆరంభం కావాలంటే

మంచి ఆరంభం కావాలంటే, జట్టుకు ప్రయోజనం చేకూరాలంటే మ్యాక్స్‌వెల్‌ను వన్‌డౌన్ (మూడో స్థానంలో) క్రీజులోకి పంపించాలని బోర్డర్ సూచించాడు. ఆ స్థానంలో అయితే అతడు స్వేచ్ఛగా బ్యాట్ ఝులిపించగలడని, అతడు సాధ్యమైనన్ని పరుగులు చేసేందుకు అవకాశం ఉంటుందని అభిప్రాయపడ్డాడు.

మ్యాక్స్‌వెల్ ప్రమాదకర ఆటగాడు

మ్యాక్స్‌వెల్ ప్రమాదకర ఆటగాడని, సాధ్యమైనన్ని ఎక్కువ బంతులు అతడు ఆడేలా టీమ్ మేనేజ్‌మెంట్ ప్లాన్ చేయాలని స్పిన్ దిగ్గజం, ఆసీస్ మాజీ క్రికెటర్ షేన్ వార్న్ సూచించాడు. మ్యాక్స్‌వెల్ బ్యాటింగ్ ఆర్డర్ గురించి తనకు అవగాహన లేదని, అయితే అతడు బ్యాటింగ్ చేస్తుంటే ఆస్వాదిస్తానని మాజీ క్రికెటర్ మార్క్ వా అన్నాడు.

మాక్స్‌వెల్‌ అత్యధిక స్కోరు 102 పరుగులు

కాగా, వన్డేల్లో మాక్స్‌వెల్‌ అత్యధిక స్కోరు 102 పరుగులు. యావరేజి 30. బౌలర్‌గా 45 వికెట్లు తీశాడు. 4/46 అత్యుత్తమం. తొలి వన్డేలో తొలుత బ్యాటింగ్‌ చేసిన ఆసీస్‌ ఐదు వికెట్ల నష్టానికి 288 పరుగులు చేయగా, ఆపై బ్యాటింగ్‌ చేసిన భారత్‌ తొమ్మిది వికెట్ల నష్టానికి 254 పరుగులు చేసి ఓటమిపాలైంది. మంగళవారం ఇరు జట్ల మధ్య రెండో వన్డే జరగనుంది.