ఆ సూచనలే పాటిస్తున్నా:
శుభ్మన్ గిల్ మరో రెండు వారాల్లో 20వ పడిలోకి అడుగు పెడుతున్న సందర్భంగా తన అభిప్రాయాలను, అనుభవాలను గురువారం ఓ ఇంటర్వ్యూలో వెల్లడించాడు. 'అండర్-19, భారత్-ఏకు ఆడుతున్నప్పటి నుంచి ద్రవిడ్ సర్ నా కోచ్. ఆయన చెప్పిన ఓ సలహా నేనేప్పటికీ గుర్తుంచుకుంటా. పరిస్థితులు ఏవైనా సరే.. నా సహజ ఆటతీరును ఎన్నటికీ మార్చుకోవద్దని చెప్పారు. బ్యాటింగ్లో సాంకేతికంగా ఎలాంటి మార్పులు చేసుకోవాలన్నా.. ప్రాథమిక ఆటను మాత్రం మార్చుకోవద్దన్నారు. ఆ సూచనలే పాటిస్తున్నా' అని గిల్ చెప్పారు.
అదే నా కెరీర్లో అత్యుత్తమం:
'మణికట్టుతో ఆడే డ్రైవ్ అచ్చం విరాట్ కోహ్లీ లాగే ఉంటుంది కదా ఇది ఎక్కడ నేర్చుకున్నావని అడగ్గా.. 'ఆ షాట్ సహజంగానే వచ్చింది. స్పిన్నర్లపై దూకుడుగా బ్యాటింగ్ చేస్తా. టర్నర్లు ఆడేటప్పుడు అలా అలవాటైంది. పేస్ బౌలర్లను ఎదుర్కొనేటప్పుడు బ్యాక్ఫుట్తో ఆడతా. వెస్టిండీస్-ఏపై చేసిన డబల్ సెంచరీ నా కెరీర్లో అత్యుత్తమం. దక్షిణాఫ్రికా-ఏపైనా శతకాలు చేయాలని లక్ష్యంగా పెట్టుకున్నా' అని గిల్ పేర్కొన్నాడు.
'సెంచరీ కోసం కాదు.. జట్టు కోసమే ఆలోచిస్తా'
యువీ దగ్గరే నేర్చుకున్నా:
'యువరాజ్ సింగ్ ఎన్నో విలువైన సలహాలు ఇచ్చారు. ఒత్తిడిని జయించేందుకు..పేరు, ప్రతిష్ఠలతో పక్కదారి పట్టకుండా ఎలా ఉండాలో యువీ దగ్గరే నేర్చుకున్నా. పంజాబ్ జట్టులో నా సీనియర్ గురుకీరత్ సింగ్ మన్తో ఎక్కువగా గడుపుతా. ఏ నిర్ణయం తీసుకోవాలన్నా నాన్ననే అడుగుతా' అని గిల్ చెప్పుకొచ్చాడు. ఫిట్నెస్ విషయంలో సీనియర్ క్రికెటర్లు విరాట్ కోహ్లీ, రోహిత్ శర్మలే స్ఫూర్తి అని గిల్ తెలిపాడు.