తొలి బంతికే డకౌట్ కావాల్సినోడు దడదడలాడించాడు.. తొలుత మిస్సయినా మళ్లీ శ్రేయస్‌కే చిక్కాడు

శ్రేయస్ అయ్యార్‌ పర్ ఫెక్ట్ త్రో

ఇక లైఫ్ దక్కడంతో డికాక్ చెలరేగిపోయాడు. బవుమా (3) నిరాశపరిచినా.. డికాక్ (68పరుగులు 43బంతుల్లో 6ఫోర్లు, 4సిక్సులు) దంచికొట్టాడు. మరో బ్యాటర్ రోసోవ్‌తో కలిసి రెండో వికెట్‌కు 90పరుగుల భాగస్వామ్యాన్ని నెలకొల్పాడు. ఇక 68పరుగుల వద్ద ఈసారి రెండో పరుగు కోసం ప్రయత్నించిన డికాక్‌ను శ్రేయస్ అయ్యార్ ఈసారి అద్భుతమైన త్రో వేయగా పంత్ వెంటనే అందుకుని వికెట్లను గిరాటేయడంతో రనౌట్ అయ్యాడు. డికాక్ ఔటయ్యేసరికి స్కోరు 2వికెట్లు కోల్పోయి 12ఓవర్లకు 120కి చేరుకుంది.

ఇంకా యువ ప్లేయర్‌గానే ఫీలవుతా

ఇండోర్‌లో జరిగే సిరీస్‌లోని చివరిదైన మూడో టీ20లో భారత్‌తో తలపడేముందు డికాక్ మాట్లాడుతూ.. పలు ఆసక్తికర విషయాలు వెల్లడించాడు. తన కెరీర్‌ గురించి 30ఏళ్ల డికాక్ మాట్లాడుతూ.. సాధ్యమైనంత ఎక్కువ కాలం జట్టులో యంగ్ ప్లేయర్‌గా ఉండటానికి ప్రయత్నిస్తానని చెప్పాడు. 'నేను నా మునుపటి ఆట స్థితికి చేరుకోవడానికి రెండు సంవత్సరాలు పట్టింది.

నేను ఇప్పటికీ జట్టులో యంగ్ ప్లేయర్‌లా ఫ్రెష్ ఇంటెంట్‌తో ఆడటానికి ప్రయత్నిస్తాను. సాధ్యమైనంత ఎక్కువ కాలం నేను కొనసాగడానికి ప్రయత్నిస్తాను. జట్టులోని నన్ను సీనియర్ అని పిలుస్తున్నప్పుడు ఆ మైండ్ సెట్ నాలోకి రానివ్వకుండా జాగ్రత్త పడతాను. అది నన్ను పట్టుకోకుండా యంగ్ ప్లేయర్‌గా ఫీలవుతాను.' అని డికాక్ చెప్పాడు. భారత్‌తో జరిగిన రెండో టీ20లో డేవిడ్ మిల్లర్ అద్భుతంగా బ్యాటింగ్ చేశాడని, అతను అలా ఆడకుంటే తాము అంత భారీ లక్ష్యానికి అంత చేరువయ్యే వాళ్లమే కామని డికాక్ చెప్పాడు.

మిల్లర్ ఆడకుంటే అంత క్లోజ్‌గా రాకపోయేవాళ్లం

'డేవిడ్ మిల్లర్ గత మ్యాచ్‌లో బాగా బ్యాటింగ్ చేశాడు. అతని ఇంటెంట్ మ్యాచ్‌లో ఏంటో నాకు స్పష్టంగా అర్థమైంది. తప్పకుండా గెలవాలనే కసిని అతను ప్రదర్శించాడు. ఛేదనలో తొలుత చాలా కష్టంగా ఇన్నింగ్స్ నడిచింది. అయినా మేము పోరాడాలని ప్రయత్నించాం. కానీ మేం లక్ష్యానికి అంత దగ్గరగా ఆగిపోతామని ఊహించలేదు.

మిల్లర్ అలాంటి ఇంటెంట్‌తో ఆడకపోతే మేం అంత చేరువగా వెళ్లేవాళ్లమే కాదు. ప్రారంభంలోనే వికెట్లు కోల్పోయిన తర్వాత అక్కడి దాకా చేరుకోవడం నిజంగా కొంచెం ఆనందంగా, కొంచెం బాధగా ఉంది. ఇది బిట్టర్ స్వీట్ విషయం. మేము ఓడిపోయినప్పటికీ మేము మిల్లర్ సెంచరీని చిన్నపాటి విజయంగా జరుపుకున్నాం.' అని డికాక్ తెలిపాడు.