షోయబ్ మాలిక్ పాస్ పోర్టు అప్పగింత

హైదరాబాద్: భారత టెన్నిస్ క్రీడాకారిణి సానియా మీర్జాను వివాహమాడిన పాకిస్తాన్ క్రికెటర్ షోయబ్ మాలిక్ పాస్ పోర్టు వ్యవహారానికి తెరపడింది. స్వదేశానికి వెళ్లేందుకు మాలిక్ కు లైన్ క్లియర్ అయింది. హైదరాబాదులోని నాంపల్లి క్రిమినల్ కోర్టు షోయబ్ మాలిక్ పాస్ పోర్టును మంగళవారం అప్పగించింది. షోయబ్ తరఫు న్యాయవాదికి ఆ పోస్ పోర్టును అప్పగించింది. షోయబ్ పాస్ పోర్టును అప్పగించాలని హైకోర్టు ఆదేశించిన విషయం తెలిసిందే.

అయేషాతో పెళ్లి వ్యవహారంలో షోయబ్ వివాదంలో చిక్కుకున్నాడు. షోయబ్ పై అయేషా సిద్దిఖి కేసు పెట్టింది. దీంతో పోలీసులు షోయబ్ పాస్ పోర్టును స్వాధీనం చేసుకుంది. ఆ తర్వాత అయేషాకు షోయబ్ విడాకులిచ్చాడు. ఆమె కేసులు ఉపసంహరించుకుంది. అయినా పాస్ పోర్టు తన చేతికి రాకపోవడంతో షోయబ్ హైకోర్టులో పిటిషన్ దాఖలు చేశాడు.