రెండో పెళ్లికి సిద్ధమైన గబ్బర్.. ఫోటోలు వైరల్

టీమిండియా మాజీ స్టార్ ఓపెనర్, అందరూ ప్రేమగా 'గబ్బర్' అని పిలుచుకునే శిఖర్ ధావన్ తన జీవితంలో కొత్త ఇన్నింగ్స్ ప్రారంభించబోతున్నారు. గత కొంతకాలంగా ప్రేమలో ఉన్న శిఖర్ ధావన్ మరియు సోఫీ షైన్ త్వరలోనే వివాహ బంధంతో ఒకటి కాబోతున్నారు. వీరి పెళ్లి వేడుకలు అట్టహాసంగా ప్రారంభమయ్యాయి. ఫిబ్రవరి 19న జరిగిన సంగీత్ వేడుకకు సంబంధించిన ఫోటోలను శిఖర్ సోషల్ మీడియాలో పంచుకోవడంతో అవి కాస్తా వైరల్‌గా మారాయి.

సంగీత్ వేడుకలో సందడి
40 ఏళ్ల శిఖర్ ధవన్ తన సంగీత్ వేడుకలో ఎంతో ఉత్సాహంగా కనిపించారు. సోఫీ షైన్‌తో కలిసి దిగిన అందమైన ఫోటోలను షేర్ చేస్తూ.. "సంగీత్ నైట్.. ఆల్మోస్ట్ ది ధావన్స్‌" (Sangeet Night, Almost the Dhawans) అనే క్యాప్షన్‌ను జోడించారు. ఈ ఫోటోలను చూసిన అభిమానులు, తోటి క్రికెటర్లు గబ్బర్‌కు శుభాకాంక్షలు తెలుపుతున్నారు. వీరిద్దరి నిశ్చితార్థం ఈ ఏడాది జనవరి 2వ తేదీన జరిగిన సంగతి తెలిసిందే.

ఎవరీ సోఫీ షైన్?
సోఫీ షైన్ ఒక ప్రముఖ మోడల్, సోషల్ మీడియా ఇన్‌ఫ్లుయెన్సర్. గత కొంతకాలంగా శిఖర్ ధావన్, సోఫీ కలిసి ఉన్న వీడియోలు, రీల్స్ ఇంటర్నెట్‌లో తెగ హల్‌చల్ చేస్తున్నాయి. వీరిద్దరి మధ్య ఉన్న కెమిస్ట్రీ అభిమానులను ఎంతగానో ఆకట్టుకుంటోంది. అయేషా ముఖర్జీతో విడాకుల తర్వాత శిఖర్ జీవితంలోకి సోఫీ ప్రవేశించింది.

తొలి వివాహం.. విడాకులు
శిఖర్ ధావన్ గతంలో అయేషా ముఖర్జీని వివాహం చేసుకున్న సంగతి తెలిసిందే. వీరికి జోరావర్ అనే కుమారుడు ఉన్నాడు. అయితే మనస్పర్థల కారణంగా వీరిద్దరూ 2023లో అధికారికంగా విడాకులు తీసుకున్నారు. కొడుకు జోరావర్ ప్రస్తుతం తల్లితోనే ఉంటున్నాడు. శిఖర్ తన కుమారుడిని ఎంతగా ప్రేమిస్తారో, అతని కోసం ఎంతగా తపిస్తాడో సోషల్ మీడియా పోస్టుల ద్వారా చాలాసార్లు బయటపడింది.

కొత్త జీవితం వైపు అడుగులు
విడాకుల తర్వాత మానసిక వేదనను అనుభవించిన శిఖర్ ధావన్.. ఇప్పుడు సోఫీ షైన్ రాకతో మళ్లీ సంతోషంగా కనిపిస్తున్నారు. త్వరలోనే వీరి వివాహం జరగనుండగా.. పెళ్లి తేదీ గురించి ఇంకా అధికారిక ప్రకటన రావాల్సి ఉంది. క్రికెట్ మైదానంలో పరుగుల వర్షం కురిపించిన గబ్బర్, ఇప్పుడు వ్యక్తిగత జీవితంలో కూడా నిలకడైన సంతోషాన్ని పొందాలని అభిమానులు కోరుకుంటున్నారు.