టీమిండియాకు వార్న్‌ సూచన.. ఆస్ట్రేలియాలోనూ డే/నైట్‌ ఆడాలి!!

ఆస్ట్రేలియాలోనూ ఆడండి:

'ఇప్పుడు భారత్‌లో డే/నైట్‌ టెస్ట్‌ ఆడేందుకు అంగీకరించిన బీసీసీఐ అధ్యక్షుడు సౌరవ్ గంగూలీ, కెప్టెన్ విరాట్‌ కోహ్లీకి శుభాకాంక్షలు. వచ్చే సంవత్సరం ఆసీస్‌ టూర్‌లో అడిలైడ్‌లోనూ టీమిండియా మరో డే/నైట్‌ టెస్ట్‌ ఆడుతుందని ఆశిస్తున్నా' అని వార్న్‌ ట్వీట్‌ చేశాడు. వార్న్‌ 145 టెస్టులు, 194 వన్డేలు ఆడి.. 708, 293 వికెట్లు తీసాడు.

వెల్‌డన్‌ సౌరవ్‌:

ఇంగ్లండ్‌ మాజీ కెప్టెన్‌ మైకేల్‌ వాన్‌ కూడా సౌరవ్‌ను అభినందించాడు. 'వెల్‌డన్‌ సౌరవ్‌. వచ్చే ఏడాదిఆస్ట్రేలియా లోనూ ఒకటి రెండు గులాబీ మ్యాచ్‌లు జరుగుతాయని భావిస్తున్నా' అని వాన్‌ ట్వీట్‌ చేశాడు. భారత్, బంగ్లా జట్లను గులాబీ బంతితో ఆడేందుకు సౌరవ్‌ ఒప్పించిన విషయం తెలిసిందే.

గులాబీ బంతే స్పష్టంగా కనిపిస్తుంది

చారిత్రక డే/నైట్‌ టెస్ట్‌ మ్యాచ్‌ సందర్భంగా దాదా మీడియాతో మాట్లాడారు. సంధ్య వెలుగులో బంతిని గుర్తించడం సంక్లిష్టంగా ఉంటుందని వాదనలు వచ్చాయి. ఈ విషయమై ప్రశ్నించగా.. 'ఎరుపు బంతి కన్నా గులాబి బంతే బాగా కనిపిస్తోంది' అని దాదా సమాధానం ఇచ్చాడు. వచ్చే ఏడాది ఆస్ట్రేలియాలో టీమిండియా గులాబి బంతితో డే/నైట్‌ టెస్టు ఆడుతుందా అన్న ప్రశ్నకు మాత్రం గంగూలీ కచ్చితమైన సమాధానం ఇవ్వలేదు.