25న జైట్లీతో సెహ్వాగ్ భేటీ

న్యూఢిల్లీ: సీనియర్ క్రికెటర్లు లేవనెత్తిన సమస్యల పరిష్కారానికి స్టార్ క్రికెటర్ వీరేంద్ర సెహ్వాగ్ మంగళవారంనాడు డిల్లి జిల్లా, క్రికెట్ అసోసియేషన్ (డిడిసిఎ) అధ్యక్షుడు అరుణ్ జైట్లీతో భేటీ కానున్నాడు. డిడిసిఎలో అవినీతి, పక్షపాత ధోరణి పేరుకుపోయిందని ఆరోపిస్తూ వీరేంద్ర సెహ్వాగ్ తిరుగుబాటు ప్రకటించిన విషయం తెలిసిందే. తాను హర్యానా రంజీ జట్టుకు మారుతానని కూడా అతను ప్రకటించాడు. అయితే సాధారణ పరిస్థితుల్లోనైతే సెహ్వాగ్ ను తాము తీసుకుంటామని, ప్రస్తుత వివాదం వల్ల సెహ్వాగ్ ను తీసుకోవడం సాధ్యం కాదని హర్యానా క్రికెట్ అసోసియేషన్ ప్రకటించింది. అయితే సెహ్వాగ్ గౌతం గంభీర్, ఆశిష్ నెహ్రా వంటి సీనియర్ ఆటగాళ్ల మద్దతు లభించింది.

వీరేంద్ర సెహ్వాగ్, జైట్లీ ఢిల్లీలో లేకపోవడం వల్ల వారిద్దరి మధ్య సమావేశంలో జాప్యం జరిగింది. డిడిసిఎ అధికారులు కూడా సమావేశమై పరిస్థితిని సమీక్షించాల్సి ఉంది. అయితే వచ్చే వారం మొదట్లో ఆ సమావేశం జరిగే అవకాశం ఉంది. అరుణ్ జైట్లీకి, సెహ్వాగ్ కు మధ్య జరిగే సమావేశంలో సెలెక్టర్ల కమిటీ పునర్వ్యస్థీకరణ ప్రధాన చర్చనీయాంశమయ్యే అవకాశం ఉంది. ఇద్దరు సెలెక్టర్లను తొలగించే విషయం కూడా ప్రస్తావనకు వచ్చే అవకాశం ఉంది.