శ్రీలంక సిరీస్ కు సెహ్వాగ్ దూరం

న్యూఢిల్లీ: భారత క్రికెట్ జట్టు ఓపెనర్ వీరేంద్ర సెహ్వాగ్ శ్రీలంకలో జరిగే ముక్కోణపు పోటీలకు దూరమయ్యే అవకాశాలున్నాయి. భుజం గాయానికి ఇంగ్లాండులో శస్త్రచికిత్స చేయించుకున్న సెహ్వాగ్ కు సెప్టెంబర్ 17వ తేదీ వరకు విశ్రాంతి అవసరమని వైద్యులు చెప్పారు. శ్రీలంక, భారత్, న్యూజిలాండ్ పాల్గొనే ముక్కోణపు పోటీలు సెప్టెంబర్ 8వ తేదీన ప్రారంభమవుతున్నాయి. దక్షిణాఫ్రికాలో జరిగిన ఐపియల్ సెమీ పైనల్ మ్యాచులో సెహ్వాగ్ గాయపడ్డాడు.

ఇదిలా వుంటే, ఎట్టకేలకు బిసిసిఐ పేసర్ జహీర్ ఖాన్ కు దక్షిణాఫ్రికాలో జరిగిన శస్త్రచికిత్సపై పెదవి విప్పింది. జహీర్ ఖాన్ కు దక్షిణాఫ్రికాలో వైద్యం జరుగుతోందని, అతను కోలుకుంటున్నాడని, ఈ ఏడాది చివరలో అతను అంతర్జాతీయ క్రికెట్ కు అందుబాటులో ఉండే అవకాశం ఉందని బిసిసిఐ కార్యదర్శి ఎన్ శ్రీనివాసన్ ఒక ప్రకటనలో తెలిపారు.