ఆస్ట్రేలియా సిరీస్లో మొండిచెయ్యి
తనను బంగ్లాదేశ్ సిరీస్లోనే సెలెక్ట్ చేస్తామని సెలెక్షన్ కమిటీ చీఫ్ చేతన్ శర్మ మాటిచ్చాడని, కానీ చివరకు హ్యాండిచ్చాడని సర్ఫరాజ్ ఖాన్ చెప్పాడు. ఆ తర్వాత కలిసినప్పుడు 'నీకూ ఛాన్స్ వస్తుంది. వెయిట్ చెయ్' అని వెళ్లిపోయాడని తెలిపాడు. ఇది విన్న తర్వాత సెలెక్షన్ కమిటీపై ఫ్యాన్స్ మరింత అక్కసు వెళ్లగక్కారు. ఆస్ట్రేలియా సిరీస్కు పక్కన పెట్టినా కూడా సర్ఫరాజ్ కుంగిపోలేదు. ఈ సిరీస్కు టీమిండియాను ప్రకటించిన రోజుల వ్యవధిలోనే రంజీ ట్రోఫీలో మరో సెంచరీ చేసి సత్తా చాటాడు. ఈ క్రమంలో ఆస్ట్రేలియాతో చివరి రెండు టెస్టులకైనా అతన్ని ఎంపిక చేయాలని డిమాండ్లు వస్తున్నాయి.
సచిన్ కొడుకుతో ఎక్కువగా ఆడేవాడు..
ఇలాంటి సమయంలో సర్ఫరాజ్ ఖాన్ తండ్రి నౌషద్ ఖాన్ ఒక వార్తా సంస్థకు ఇంటర్వ్యూ ఇచ్చాడు. చిన్న తనం నుంచి చిన్నా చితకా పనులు చేస్తూ కొడుకును క్రికెటర్ను చేశాడతను. ఈ క్రమంలో ఒకసారి కొడుకు అన్న మాటలు విని తన నోట మాట రాలేదని గుర్తుచేసుకున్నాడు. క్రికెట్ దేవుడుగా పిలుచుకునే సచిన్ టెండూల్కర్ కుమారుడు అర్జున్ టెండూల్కర్తో సర్ఫరాజ్ చిన్నతనంలో ఎక్కువ క్రికెట్ ఆడాల్సి వచ్చింది. అయితే అర్జున్తో కలిసి, లేదా అతని ప్రత్యర్థిగా ఆడేవాడు. ఈ క్రమంలోనే ఒకసారి తండ్రితో సర్ఫరాజ్ ఈ విషయం చెప్పాడట.
అర్జున్ కన్నా లక్కీ..
అర్జున్ గురించి తండ్రికి చెప్తూ.. 'ఆ అర్జున్ టెండూల్కర్ ఎంత లక్కీనో కదా నాన్న. తను సచిన్ కొడుకు. అతని దగ్గర అన్నీ ఉన్నాయి. కార్లు, ఐప్యాడ్లు.. అన్నీ' అన్నాడట సర్ఫరాజ్. అతనికి ఏం సమాధానం చెప్పాలో కూడా తనకు తెలియలేదని నౌషద్ ఖాన్ గుర్తుచేసుకున్నాడు. అయితే ఆ మాటలు అన్న కాసేపటికే తన వద్దకు పరిగెత్తుకొచ్చిన సర్ఫరాజ్.. 'అన్నీ ఉన్నా వాళ్ల నాన్న అర్జున్తో ఎక్కువ సేపు గడపలేడు. కానీ నువ్వు మాత్రం నాతో రోజంతా గడుపుతావు. నేనే అర్జున్ కన్నా లక్కీ కదా' అని చెప్పాడట.