'సంజూ రాజస్థాన్ జట్టును వీడటానికి కారణం ఆ బుడ్డోడే'

ప్రముఖ క్రికెట్ విశ్లేషకుడు, భారత మాజీ ఓపెనర్ ఆకాష్ చోప్రా రాజస్థాన్ రాయల్స్ కెప్టెన్ సంజూ శాంసన్ జట్టును వీడాలనుకుంటున్నాడనే వార్తలపై స్పందించారు. సంజూ శాంసన్ ఈ నిర్ణయం తీసుకోవడానికి గల కారణాలను ఆయన విశ్లేషించారు. వైభవ్ సూర్యవంశీ వంటి యువ ఆటగాళ్ల రాక వల్ల జట్టులో తన ప్రాముఖ్యత తగ్గుతోందని భావించడం వంటి అంశాలను ఆకాష్ చోప్రా ముఖ్య కారణాలుగా పేర్కొన్నారు.

ఆకాష్ చోప్రా అభిప్రాయం
ఆకాష్ చోప్రా తన యూట్యూబ్ ఛానెల్‌లో ఒక వీడియో ద్వారా ఈ అంశాన్ని విశ్లేషించారు. ఆయన ప్రకారం.. గతంలో సంజు శాంసన్, రాజస్థాన్ రాయల్స్ మధ్య అద్భుతమైన అవగాహన ఉండేది. గత మెగా వేలంలో జోస్ బట్లర్‌ను కూడా వదులుకోవడానికి సంజూ శాంసన్ ఓపెనింగ్ చేయాలనే ఆసక్తి ఒక కారణమని ఆయన అభిప్రాయపడ్డారు. అయితే ఇప్పుడు పరిస్థితి మారిందని ఆకాష్ చోప్రా భావిస్తున్నారు. ఈ మార్పులకు ప్రధాన కారణం వైభవ్ సూర్యవంశీ అని ఆయన పేర్కొన్నారు.

2025 సీజన్‌కు ఆటగాళ్లను రిటైన్ చేసుకోవడంలో సంజూ శాంసన్‌కు పెద్ద పాత్ర ఉండేదని ఆకాష్ చోప్రా గతంలో భావించారు. కానీ ఇప్పుడు, అతని మాట వినబడడం లేదని, జట్టులో తన ప్రాముఖ్యత తగ్గిందని సంజూ శాంసన్ భావిస్తున్నాడని ఆయన అంటున్నారు. వైభవ్ సూర్యవంశీ ఒక ఓపెనర్‌గా జట్టులోకి రావడం వల్ల, ఇప్పటికే ఓపెనింగ్‌లో యశస్వి జైస్వాల్ ఉన్నాడు. దీంతో సంజూ శాంసన్‌కు ఓపెనింగ్ అవకాశాలు తగ్గుతాయి. అలాగే ధ్రువ్ జురేల్‌ను కూడా టాపార్డర్‌లో బ్యాటింగ్ చేయించాలని జట్టు కోరుకుంటోంది. ఈ కారణాల వల్ల సంజూ శాంసన్ జట్టులో అదనపు ఆటగాడిగా మారిపోయారని ఆకాష్ చోప్రా భావిస్తున్నారు. మీడియా నివేదికల ప్రకారం.. 2025 సీజన్ తర్వాత సంజూ శాంసన్, రాజస్థాన్ రాయల్స్ మధ్య విభేదాలు తలెత్తాయి. గాయాలు, ఇతర కారణాల వల్ల సంజూ శాంసన్‌కు తక్కువ మ్యాచ్‌లలోనే అవకాశం లభించింది. ఈ పరిణామాలు కూడా అతని అసంతృప్తికి కారణం కావచ్చు.

ఇతర ఫ్రాంచెజీల ఆసక్తి
సంజూ శాంసన్ రాజస్థాన్‌ను వీడనున్నారనే ఊహాగానాల నేపథ్యంలో ఇతర జట్లు అతనిపై ఆసక్తి చూపిస్తున్నాయి. ముఖ్యంగా చెన్నై సూపర్ కింగ్స్ (CSK), కోల్‌కతా నైట్ రైడర్స్ (KKR) వంటి జట్లు సంజూను తమ జట్టులోకి తీసుకోవడానికి ప్రయత్నిస్తున్నాయని సమాచారం. ఐపీఎల్ నిబంధనల ప్రకారం, జట్లు డబ్బు లేదా ఇతర ఆటగాళ్లను ఇచ్చిపుచ్చుకునే ట్రేడింగ్ ద్వారా ఆటగాళ్లను బదిలీ చేసుకోవచ్చు. ఈ ట్రేడింగ్ ద్వారా సంజూ శాంసన్ సీఎస్కేలోకి వెళ్లవచ్చని కూడా వార్తలు వస్తున్నాయి. ఆకాష్ చోప్రా కూడా సంజూ కోసం కేకేఆర్ మరింత ఆసక్తి చూపాలని సూచించారు.

సంజూ శాంసన్ రాజస్థాన్ రాయల్స్ జట్టును వీడాలనే ఆలోచనలో ఉన్నాడని, దీనికి ప్రధాన కారణం యువ ఆటగాడు వైభవ్ సూర్యవంశీ రాక అని ఆకాష్ చోప్రా అభిప్రాయపడ్డారు. జట్టులో తన స్థానం, ప్రాముఖ్యత తగ్గాయని సంజూ శాంసన్ భావిస్తున్నాడని ఆయన విశ్లేషించారు. అయితే ఇవన్నీ కేవలం ఊహాగానాలు మాత్రమేనని, రాజస్థాన్ రాయల్స్ ఫ్రాంచైజీ, సంజూ శాంసన్ మనసులో ఏముందో స్పష్టంగా తెలియదని ఆకాష్ చోప్రా స్పష్టం చేశారు.