బిసిసిఐపై బొంబాయి హైకోర్టుకెక్కిన శిల్పా శెట్టి రాజస్థాన్ రాయల్స్

ముంబై: ఐపియల్ 4 నుంచి తమను బహిష్కరించడంపై సినీ నటి శిల్పా శెట్టికి చెందిన రాజస్థాన్ రాయల్స్ ఇండియన్ ప్రీమియర్ లీగ్ (ఐపియల్) భారత క్రికెట్ నియంత్రణ మండలి (బిసిసిఐ)పై బొంబాయి హైకోర్టుకెక్కింది. ఐపియల్ పాలక మండలిని గానీ, తమను గానీ సంప్రదించకుండా షేర్ హోల్డింగ్ పద్ధతిని మార్చారని ఆరోపిస్తూ బిసిసిఐ రాజస్థాన్ రాయల్స్ ను ఐపియల్ 4 నుంచి నిషేధించింది.

రాజస్థాన్ రాయల్స్ తరఫున బొంబాయి హైకోర్టులో సుప్రీంకోర్టు న్యాయవాది హరీష్ సాల్వే వాదిస్తున్నారు. విదేశాల్లో ఉన్న సాల్వే శనివారం సాయంత్రం దేశానికి తిరిగి వచ్చారు. ఆ వెంటనే రాజస్థాన్ రాయల్స్ సహ యజమాని మనోజ్ బదాలేతో సమావేశమయ్యారు. బిసిసిఐ నిర్ణయానికి బొంబాయి హైకోర్టులో సవాల్ చేయాలని ఈ సమావేశంలో నిర్ణయం తీసుకున్నారు. వ్యక్తుల మీద ఆధారపడి రాజస్థాన్ రాయల్స్ ను నిషేధించలేదని బిసిసిఐ చీఫ్ శశాంక్ మనోహర్ చెప్పారు.