రోహిత్ శర్మ రిటైర్మెంట్‌పై గంభీర్ క్లారిటీ.. వీడియో వైరల్

Viral Video: భారత్, ఆస్ట్రేలియా జట్ల మధ్య జరిగిన వన్డే సిరీస్‌లో టీమిండియా ఇప్పటికే 0-2 తేడాతో ఓటమి పాలైంది. ఈ సిరీస్‌లోని రెండో మ్యాచ్‌కు ముందు టీమిండియా స్టార్ బ్యాటర్ రోహిత్ శర్మ ప్రదర్శనపై ప్రశ్నలు తలెత్తాయి. ముఖ్యంగా హిట్ మ్యాన్ ఈ మ్యాచ్‌లో విఫలమైతే జట్టు నుంచి తొలగించవచ్చని, రోహిత్ అంతర్జాతీయ కెరీర్ కు ప్రమాదం పొంచి ఉందని ఊహాగానాలు వచ్చాయి.

ఈ నేపథ్యంలో సోషల్ మీడియాలో జట్టు హెడ్ కోచ్ గౌతమ్ గంభీర్, రోహిత్ శర్మల మధ్య జరిగిన సంభాషణకు సంబంధించిన ఓ వీడియో క్లిప్ విపరీతంగా వైరల్ అవుతోంది. భారత్-ఆస్ట్రేలియా వన్డే సిరీస్ జరుగుతున్న సమయంలో తెరవెనుక జరిగిన ఈ సంభాషణలో కోచ్ గౌతమ్ గంభీర్ రోహిత్‌తో సరదాగా మాట్లాడారు.

గంభీర్ సరదా కామెంట్లు
వైరల్ అవుతున్న ఆ వీడియోలో గౌతమ్ గంభీర్ రోహిత్‌తో మాట్లాడుతూ, "రోహిత్, అందరూ ఈరోజు నీకు వీడ్కోలు మ్యాచ్ (ఫేర్‌వెల్ మ్యాచ్) అని అనుకున్నారు. కనీసం ఒక ఫోటో అయినా అప్‌లోడ్ చెయ్యి" అని సరదాగా అన్నారు. జట్టు ఓటమి తర్వాత కూడా అంతర్జాతీయ క్రికెట్ ఒత్తిడిలో తెరవెనుక ఉన్న తేలికైన క్షణాన్ని ఈ క్లిప్ అభిమానులకు చూపించింది. అయితే, ఈ వీడియో మాత్రం అధికారికంగా ధ్రువీకరించబడలేదు. ధృవీకరించబడలేదు. ఈ సంభాషణ జోక్ అయినా లేదా సీరియస్‌గా మాట్లాడినా.. ఇది అభిమానుల మధ్య చర్చనీయాంశంగా మారింది. సిరీస్‌లోని మొదటి మ్యాచ్ ద్వారా జట్టులోకి తిరిగి వచ్చిన రోహిత్ శర్మ ఆ మ్యాచ్‌లో కేవలం 8 పరుగులు చేసి విమర్శల పాలయ్యాడు.

కానీ రెండో వన్డేలో అద్భుతంగా పుంజుకున్న రోహిత్ శర్మ 73 పరుగుల మెరుపు ఇన్నింగ్స్ ఆడాడు. శ్రేయస్ అయ్యర్ (61)తో కలిసి రోహిత్, భారత స్కోరును 264 పరుగులకు చేర్చడంలో కీలక పాత్ర పోషించాడు. ఆస్ట్రేలియా ఈ మ్యాచ్ గెలిచి సిరీస్‌లో 2-0 ఆధిక్యం సాధించినప్పటికీ ఒత్తిడిలో రోహిత్ ఆడిన ఈ ఇన్నింగ్స్ అతని దృఢత్వాన్ని, ప్రశాంతమైన స్వభావాన్ని నిరూపించింది.

అభిమానుల్లో 2027 ప్రపంచ కప్ సందేహం
వన్డే కెప్టెన్సీ కోల్పోయినప్పటి నుంచి సోషల్ మీడియాలో అభిమానుల మధ్య 2027 వన్డే ప్రపంచ కప్‌లో రోహిత్ శర్మ, విరాట్ కోహ్లీల స్థానాలపై తీవ్ర చర్చ, ఊహాగానాలు నడుస్తున్నాయి. అడిలైడ్‌లో రోహిత్ కష్టమైన పవర్‌ప్లేలో జోష్ హేజిల్‌వుడ్ వేసిన 17 డాట్ బాల్స్‌ను ఓపికతో ఎదుర్కొన్నాడు. శ్రేయస్ అయ్యర్‌తో కలిసి తెలివిగా పరుగులు జోడించాడు. ఈ ఇన్నింగ్స్‌లో రోహిత్ తనదైన క్లాసిక్ స్టైల్‌లో పుల్, ఫ్లిక్ షాట్‌లతో అద్భుతమైన ఫోర్లు కొట్టాడు. సిరీస్ ఓడిపోయినప్పటికీ, ఈ ఇన్నింగ్స్ ద్వారా రోహిత్.. తనలో ఇంకా చాలా క్రికెట్ మిగిలి ఉందని, విమర్శలకు సమర్థంగా జవాబివ్వగలనని నిరూపించాడు.