ఆర్జే మహవాష్ ఫేవరెట్ క్రికెట్ ఎవరో తెలుసా?

టీ20 ప్రపంచ కప్ 2026 సందడి నేపథ్యంలో టీమిండియా స్పిన్నర్ యుజ్వేంద్ర చాహల్, ప్రముఖ కంటెంట్ క్రియేటర్ ఆర్జే మహవాష్‌ల మధ్య ఉన్న అనుబంధం మళ్లీ చర్చనీయాంశంగా మారింది. ముంబైలో జరిగిన ఒక కార్యక్రమంలో పాపరాజీలు ఆమెను పలకరించినప్పుడు ఓ ఆసక్తికర సన్నివేశం చోటుచేసుకుంది. పాపరాజీలు మహవాష్‌ను చుట్టుముట్టి, ఆమెకు ఇష్టమైన క్రికెటర్ ఎవరని ప్రశ్నించారు. ఈ ప్రశ్న వెనుక యుజ్వేంద్ర చాహల్ పేరును రాబట్టాలనే పాపరాజీల వ్యూహాన్ని ఆమె ఇట్టే కనిపెట్టేశారు. ఏమాత్రం తడబడకుండా, చాలా స్మార్ట్‌గా బదులిస్తూ.. "ఇంకేమైనా ఉందా? నువ్వు కాంట్రవర్సీ (వివాదం) క్రియేట్ చేయాలని చూస్తున్నావు కదా.. చెబుతా నీ పని" అంటూ నవ్వుతూనే సెటైర్ వేశారు. తనపై వచ్చే పుకార్లను ఆమె ఎంత చాకచక్యంగా తిప్పికొట్టగలరో ఈ సమాధానంతో మరోసారి నిరూపితమైంది.

చాంపియన్స్ ట్రోఫీ నుంచి అన్‌ఫాలో వరకు
ఆర్జే మహవాష్ పేరు యుజ్వేంద్ర చాహల్‌తో ముడిపడటానికి కొన్ని కీలక పరిణామాలు కారణమయ్యాయి. 2025లో జరిగిన ఐసీసీ చాంపియన్స్ ట్రోఫీ ఫైనల్ సమయంలో వీరిద్దరూ కలిసి బహిరంగంగా కనిపించడం సోషల్ మీడియాలో పెద్ద దుమారం రేపింది. అప్పటి నుండి వీరిద్దరూ డేటింగ్‌లో ఉన్నారనే ప్రచారం జోరుగా సాగింది. అయితే, 2026 ప్రారంభంలో వీరిద్దరూ ఇన్‌స్టాగ్రామ్‌లో ఒకరినొకరు అన్‌ఫాలో చేసుకోవడం గమనార్హం. ఈ పరిణామంతో వీరి మధ్య ఉన్న స్నేహబంధం తెగిపోయిందనే చర్చ మళ్లీ మొదలైంది.

చాహల్ వ్యక్తిగత జీవితంలో ఒడిదుడుకులు
యుజ్వేంద్ర చాహల్ వ్యక్తిగత జీవితం గత ఏడాది కాలంగా వార్తల్లో నిలుస్తూనే ఉంది. 2020లో కొరియోగ్రాఫర్ ధనశ్రీ వర్మను పెళ్లాడిన చాహల్.. ఆమెతో విభేదాల కారణంగా మార్చి 2025లో అధికారికంగా విడాకులు తీసుకున్నారు. అప్పటి నుంచి చాహల్ సింగిల్‌గా ఉంటున్నారు. వృత్తిపరంగా చూస్తే, ప్రస్తుత టీ20 ప్రపంచకప్ 2026 జట్టులో ఆయనకు చోటు దక్కలేదు. అయితే రాబోయే ఐపీఎల్ 2026 సీజన్‌లో పంజాబ్ జట్టు తరపున ఆయన తన మ్యాజిక్ స్పిన్‌తో మళ్లీ ప్రేక్షకులను అలరించడానికి సిద్ధమవుతున్నారు.

వివాదాలను దాటవేసిన స్మార్ట్ ఆర్జే
ఆర్జే మహవాష్ గతంలో జర్నలిస్టుగా పనిచేసిన అనుభవం ఉండటంతో, మీడియా అడిగే చిక్కు ప్రశ్నలను ఎలా ఎదుర్కోవాలో ఆమెకు బాగా తెలుసు. పాపరాజీలు తన ఫేవరెట్ క్రికెటర్ గురించి అడిగినప్పుడు నేరుగా సమాధానం చెప్పకుండా.. దాన్ని ఒక ఫన్నీ మూమెంట్‌గా మార్చేసి అందరి నోళ్లు మూయించారు. ప్రస్తుతం ఆమెకు సంబంధించిన ఈ వీడియో సోషల్ మీడియాలో విపరీతంగా షేర్ అవుతోంది.