రియాన్ పరాగ్ డ్యాన్స్ చూశారా..కుమ్మేశాడు బ్రో..!!

ఐపీఎల్ 2026 సీజన్లో రాజస్థాన్ రాయల్స్ అప్రతిహత విజయాలతో దూసుకుపోతోంది. గతంలో కేవలం ఆటగాడిగానే కాకుండా తన విలక్షణమైన శైలితో వార్తల్లో నిలిచే యువ ఆల్‌రౌండర్ రియాన్ పరాగ్.. ఈ సీజన్‌లో కెప్టెన్‌గా తనలోని సరికొత్త కోణాన్ని ఆవిష్కరించాడు. యువ ఆల్‌రౌండర్ రియాన్ పరాగ్ కెప్టెన్సీలో రాజస్థాన్ జట్టు పక్కా వ్యూహాలతో ప్రత్యర్థులను చిత్తు చేస్తూ.. ఇప్పటివరకు ఆడిన 3 మ్యాచ్‌ల్లోనూ గెలిచి పాయింట్ల పట్టికలో అగ్ర స్థానాన్ని కైవసం చేసుకుని.. ప్లేఆఫ్స్ రేసులో బలమైన జట్టుగా నిలిచింది.

రియాన్ పరాగ్ కెప్టెన్సీలో రాజస్థాన్ రాయల్స్ జట్టు దూసుకెళ్తుండడంతో సోషల్ మీడియాలో అతని పాత వీడియోలు మళ్లీ ట్రెండింగ్‌లోకి వచ్చాయి. ముఖ్యంగా 2018 అండర్-19 ప్రపంచకప్ సమయంలో తీసిన ఒక డ్యాన్స్ వీడియో ఇప్పుడు నెట్టింట వైరల్‌గా మారింది. ఈ వీడియోలో పరాగ్ తన భారత అండర్-19 జట్టు సహచరుల ముందు ఉత్సాహంగా డ్యాన్స్ చేస్తూ కనిపిస్తున్నాడు.

వైరల్ అవుతున్న పాత వీడియో
2018 అండర్-19 వరల్డ్ కప్ సమయంలో చిత్రీకరించిన ఈ వీడియోలో రియాన్ పరాగ్ అద్భుతమైన స్టెప్పులతో అదరగొడుతుండగా.. పక్కనే ఉన్న శుభ్‌మన్ గిల్, శివం మావి, అభిషేక్ శర్మ వంటి ఆటగాళ్లు అతడిని ఉత్సాహపరుస్తున్నారు. వారు రియాన్ పరాగ్ స్టెప్పులను చూస్తూ అతడిని ప్రోత్సహించడం ఆ వీడియోలో ప్రత్యేక ఆకర్షణగా నిలిచింది. మైదానంలో ఎప్పుడూ సరదాగా ఉండే పరాగ్, తన డ్యాన్స్ మూమెంట్స్‌తో గతంలోనూ వార్తల్లో నిలిచాడు.

గతంలో రియాన్ పరాగ్ తన ప్రవర్తన లేదా డ్యాన్స్ వల్ల నెటిజన్ల విమర్శలు, ట్రోలింగ్‌ను ఎదుర్కొన్న సందర్భాలు చాలా ఉన్నాయి. అయితే ఈసారి పరిస్థితి భిన్నంగా ఉంది. కెప్టెన్‌గా బాధ్యతాయుతమైన ఇన్నింగ్స్‌లు ఆడుతూ.. జట్టును విజయపథంలో నడిపిస్తుండడంతో అభిమానులు ఈ పాత వీడియోను పాజిటివ్‌గా షేర్ చేస్తున్నారు. "మైదానంలో ఎంత సరదాగా ఉంటాడో, ఆట విషయంలో అంతే సీరియస్‌గా ఉంటాడు" అంటూ పరాగ్ కెప్టెన్సీపై ప్రశంసలు కురిపిస్తున్నారు. మొత్తానికి రియాన్ పరాగ్ నాయకత్వంలో రాజస్థాన్ రాయల్స్ ఈ సీజన్‌లో టైటిల్ ఫేవరెట్‌గా కనిపిస్తోంది.