టెస్టుల్లోకి పంత్.. రెండో బంతినే సిక్సుగా మలిచి రికార్డుల్లోకి..

దినేశ్ కార్తీక్ స్థానంలో దిగిన పంత్:

సీనియర్ జట్టుతో సహా ఇంగ్లండ్ పర్యటనకు వచ్చిన భారత్ ఏ తరఫున బరిలోకి దిగిన రిషబ్..రెండు ఫస్ట్‌క్లాస్ మ్యాచ్‌ల్లో ఆకట్టుకున్నాడు. ఇంగ్లాండ్ ఏతో మ్యాచ్‌లో 67 సగటుతో 189 పరుగులు చేశాడు, ఇందులో రెండు అర్ధసెంచరీలు ఉన్నాయి. ఇలా తనకు దక్కిన ప్రతి అవకాశాన్ని ఈ యువ వికెట్‌కీపర్ అద్భుతంగా ఒడిసిపట్టుకున్నాడు. ఇంగ్లాండ్‌తో తొలి రెండు టెస్ట్‌ల్లో దినేశ్ కార్తీక్ 0, 20, 1, 0 పరుగులతో ఘోరంగా నిరాశపరచడంతో పంత్ అరంగేట్రానికి మార్గం సుగమమైంది.

వరుసగా 3వికెట్లు తీసినా.. 300కి పైగా స్కోరు:

ఈ సిరీస్‌‌లో తొలిసారి 300కిపైగా పరుగులు చేసింది. మొదటి రోజు ఆట ముగిసే సమయానికి ఆరు వికెట్లు నష్టపోయి 307 పరుగులు చేసింది. పంత్ 22 పరుగులతో క్రీజులో ఉన్నాడు. ఓపెనర్లు శిఖర్ ధావన్ (35), కేఎల్ రాహుల్ (23) తొలి వికెట్‌కు 60 పరుగులు జోడించి శుభారంభం ఇచ్చారు. కానీ వోక్స్ వరుసబెట్టి మూడు వికెట్లు తీయడంతో భారత్ 82 పరుగులకే మూడు వికెట్లు చేజార్చుకుంది.

రెండో బంతినే సిక్సుగా మలిచి:

ఈ దశలో కెప్టెన్ కోహ్లి (97), రహానే (81) నాలుగో వికెట్‌కు 159 పరుగులు జోడించడంతో భారత్ కోలుకుంది. సెంచరీల ముంగిట వీరిద్దరూ అవుటయ్యారు. కానీ టీమిండియా గౌరవ ప్రదమైన స్కోరు చేయగలిగింది. ఈ మ్యాచ్‌తోనే తొలిసారి టెస్టుల్లో అడుగుపెట్టిన యువ ఆటగాడు రిషబ్ పంత్.. వస్తూ వస్తూనే సత్తా చాటాడు. ఏడో స్థానంలో బ్యాటింగ్‌కు దిగిన పంత్.. తాను ఎదుర్కొన్న రెండో బంతికే సిక్స్ బాది ఖాతా తెరిచాడు.

పంత్ ఆటతీరు గిల్‌క్రిస్ట్‌ను తలపించిందని

సిక్స్ ద్వారా టెస్టుల్లో ఖాతా తెరిచిన తొలి భారత బ్యాట్స్‌మెన్‌గా రికార్డులకెక్కాడు. ఓవరాల్‌గా ఈ ఘనత సాధించిన 12వ ఆటగాడిగా పంత్ రికార్డ్ క్రియేట్ చేశాడు. రషీద్ విసిరిన తొలి బంతిని డిఫెన్స్ ఆడిన రిషబ్.. తర్వాతి గుగ్లీని బౌలర్‌ మీదుగా సిక్స్‌గా మలిచాడు. తొలి రోజు పంత్ ఆటతీరు గిల్‌క్రిస్ట్ ఆటను తలపించిందని నెటిజన్లు ప్రశంసలు గుప్పించారు. సౌరభ్ గంగూలీ లాంటి మాజీ ఆటగాళ్లు సైతం పంత్‌ను పొగడ్తలతో ముంచెత్తారు.