పంత్ తప్పిదం.. మండిపడిన మార్‌క్రమ్! (వీడియో)

ఐపీఎల్ 2026లో భాగంగా చెన్నైలోని చెపాక్ స్టేడియంలో ఆదివారం సీఎస్కే, లక్నో జట్ల మధ్య జరిగిన మ్యాచ్ కేవలం ఆటకే పరిమితం కాలేదు. స్టేడియంలో ఆటగాళ్ల మధ్య ఓ హైడ్రామాకు కూడా వేదికైంది. లక్నో జట్టు బ్యాటింగ్ చేస్తున్న సమయంలో ఆ జట్టు కీలక బ్యాటర్లు రిషబ్ పంత్, ఐడెన్ మార్‌క్రమ్ మధ్య జరిగిన ఓ భారీ సమన్వయ లోపం ఇప్పుడు క్రికెట్ వర్గాల్లో హాట్ టాపిక్‌గా మారింది. పంత్ చేసిన తప్పుడు పిలుపు వల్ల మార్‌‌క్రమ్ తన వికెట్ కోల్పోయే పరిస్థితి రావడంతో స్టేడియంలోనే కెప్టెన్ అని కూడా చూడకుండా తన కోపాన్ని ప్రదర్శించాడు.

పిచ్ మధ్యలో చిక్కుకున్న మార్‌క్రమ్
ఈ సంఘటన లక్నో ఇన్నింగ్స్ 10వ ఓవర్‌లో చోటుచేసుకుంది. జేమీ ఓవర్టన్ వేసిన షార్ట్ బంతిని రిషబ్ పంత్ నేర్పుగా స్క్వేర్ లెగ్ వైపు ఆడాడు. బంతి ఫీల్డర్ చేతికి దూరంగా వెళ్లడాన్ని గమనించిన రిషబ్ పంత్.. వెంటనే రెండో పరుగు కోసం మార్‌క్రమ్‌ను గట్టిగా పిలిచాడు. కెప్టెన్ పిలుపుతో మార్‌క్రమ్ ఏమాత్రం ఆలోచించకుండా నాన్-స్ట్రైకర్ ఎండ్ నుంచి బుల్లెట్‌లా దూసుకొచ్చాడు. అయితే మార్‌క్రమ్‌ దాదాపు సగం పిచ్ దాటిన తర్వాత, బంతి ఫీల్డర్ చేతికి చిక్కడం చూసిన పంత్ అకస్మాత్తుగా ఆగిపోయి వెనక్కి వెళ్లిపోయాడు. అప్పటికే మార్‌క్రమ్‌ సగం పిచ్ వద్ద నిస్సహాయంగా నిలబడిపోయాడు.

చెన్నై ఫీల్డర్ల పొరపాటు.. మార్‌క్రమ్‌ ప్రాణం గట్టెక్కింది!
ఆ క్షణంలో మైదానంలోని ప్రేక్షకులంతా మార్‌క్రమ్‌ రనౌట్ అవ్వడం ఖాయమని భావించారు. మార్‌క్రమ్‌ కూడా తన వికెట్ పడిపోయిందని దాదాపుగా నిర్ధారించుకుని, వెనక్కి వెళ్లే ప్రయత్నం కూడా మానేసి పిచ్ మధ్యలోనే నిలబడిపోయాడు. అయితే ఇక్కడే మ్యాచ్‌లో ఒక అనూహ్య మలుపు చోటుచేసుకుంది. బంతిని అందుకున్న చెన్నై ఫీల్డర్ నేరుగా స్టంప్స్‌కు త్రో విసిరాడు, కానీ అది వికెట్లకు తగలకుండా పక్క నుంచి వెళ్లిపోయింది. ఈ అదృష్టం వల్ల మార్‌క్రమ్‌ వేగంగా క్రీజులోకి చేరుకుని ఊపిరి పీల్చుకున్నాడు. లేదంటే లక్నో ఓ కీలక వికెట్‌ను అనవసరంగా కోల్పోయేది. కానీ 13వ ఓవర్లో మార్‌క్రమ్‌ రనౌట్ కావడం గమనార్హం.

మైదానంలోనే పంత్‌పై విరుచుకుపడ్డ మార్‌క్రమ్‌
రనౌట్ ముప్పు నుంచి తప్పించుకున్నప్పటికీ.. మార్‌క్రమ్‌ కోపం మాత్రం తగ్గలేదు. పంత్ చేసిన ఆ అనాలోచిత పిలుపుపై మార్‌క్రమ్‌ తీవ్ర అసహనం వ్యక్తం చేశాడు. పరుగు పూర్తి చేసిన తర్వాత పంత్ వైపు కోపంగా చూస్తూ.. అసలు బ్యాకప్ లేకుండా అంత రిస్కీ రన్ కోసం ఎందుకు పిలిచావని సైగలతో ప్రశ్నించాడు. పంత్ ఏదో వివరణ ఇచ్చే ప్రయత్నం చేసినప్పటికీ.. మార్‌క్రమ్‌ ముఖంలో ఫ్రస్ట్రేషన్ స్పష్టంగా కనిపించింది. ప్రస్తుతం ఈ "మిక్స్-అప్" వీడియో సోషల్ మీడియాలో వైరల్ అవుతుండగా.. నెటిజన్లు పంత్ శైలిని విమర్శిస్తున్నారు.