ఎమ్‌సీఏ ఎందుకిలా చేసింది: వెయ్యి పరుగుల ధనవాడే ప్రవర్తన బాలేదా?

ప్రణవ్ ధనవాడే ప్రదర్శనపై ఎమ్‌సీఏ సమీక్ష

'ప్రణవ్‌కు స్కాలర్ షిప్ ప్రకటించిన సమయంలోనే ప్రతి సీజన్‌ తర్వాత అతడి ప్రదర్శనపై సమీక్ష జరిపి, ఆ తర్వాతే తర్వాతి సీజన్‌కు సాయం అందించే విషయంపై నిర్ణయం తీసుకుంటామని పేర్కొన్నాం' అని ఎమ్‌సీఏ సంయుక్త కార్యదర్శి ఉమేశ్‌ తెలిపాడు. అయితే ప్రణవ్‌కు గత ఆరు నెలల నుంచి స్కాలర్ షిప్ అందడం లేదని ఆలస్యం అవుతుందా లేక ఆపేశారా అర్ధం కావడం లేదని ప్రణవ్‌ తండ్రి ప్రశాంత్‌ అంటున్నాడు.

వెయ్యి పరుగులతో ప్రణవ్‌పై పెరిగిన అంచనాలు

గతేడాది జనవరిలో 1000 పరగులు ఇన్నింగ్స్‌తో ప్రణవ్‌పై అంచనాలు పెరిగాయి. అయితే ఆ తర్వాత నుంచి అతడి ప్రదర్శన మెరుగవలేదు. అంతేకాదు మైదానం కూడా చిన్నది కావడం వల్లే ప్రణవ్‌ అంత భారీ ఇన్నింగ్స్‌ ఆడాడని అప్పట్లో వార్తలు వచ్చిన సంగతి తెలిసిందే. దీంతో అతడి ప్రపంచ రికార్డుపై క్రీడా విశ్లేషకులు పలు అనుమానాలను వ్యక్తం చేశారు.

ఎమ్‌సీఏ ఎంపిక చేసిన 35 మందిలో ప్రణవ్‌కు దక్కని చోటు

అంతేకాదు అండర్‌ 19 ఆటగాళ్లకు ప్రత్యేక ట్రైనింగ్ ప్రాక్టీస్ కోసం ఎమ్‌సీఏ 35 మందిని ఎంపిక చేసింది. ఈ జాబితాలో ప్రవణ్‌కు చోటు దక్కలేదు. ఇటీవల ఎమ్‌సీఏ మ్యాచ్‌కు నిర్వహించిన సెలక్షన్‌ ట్రయల్స్‌ నుంచి కూడా కోచ్‌ అతడిని తప్పించాడు. ప్రణవ్‌ వికెట్‌ కీపింగ్‌ బాగానే చేస్తున్నప్పటికీ.. బ్యాటింగ్‌లో మెరుగవ్వాల్సి ఉందని కోచ్‌ మోబిన్‌ అంటున్నాడు.

ప్రణవ్ బిహేవియర్ పట్ల కోచ్ అసంతృప్తి

ప్రణవ్ బిహేవియర్ పట్ల కోచ్ మోబిన్‌ కూడా ఏమంత సంతృప్తిగా లేడని తెలుస్తోంది. గతంలో కూడా పలుమార్లు ప్రణవ్ ధనవాడే బిహేవియర్ మార్చుకోవాలని, క్రికెట్ పైన సీరియస్‌గా దృష్టి సారించాలని గట్టి వార్నింగ్ ఇచ్చిన సంగతి కూడా తెలిసిందే. ప్రణవ్ తన అయిదేళ్ల వయస్సులో మోబిన్ కళ్యాణ్‌లో నడుపుతున్న మోడర్న్ క్రికెట్ క్లబ్‌కు వచ్చాడు.

పలుమార్లు ప్రణవ్ ధనవాడేకు హెచ్చరికలు

తన అకాడమీలోని మిగతా వారిలాగే ప్రణవ్‌కు కూడా నేర్పించానని కోచ్ చెప్పారు. అయితే, ప్రాక్టీస్, వామప్ సమయంలో ప్రణవ్ జోకులు పేల్చుతూ సీరియస్‌నెస్‌గా కనిపించకపోయేవాడన్నారు. మిగతా వారిని ఆటపట్టించేవాడన్నారు. ఓసారి ఆల్ ఇండియా టోర్నమెంటులో ఆడుతున్న సమయంలో.. ప్రణవ్ తాను అవుటైన సమయంలో నవ్వడం చూశానని, అప్పుడు తనకు కోపం వచ్చిందన్నారు. రిప్లేలోను బిగ్ స్క్రీన్‌లో అది కనిపించిందన్నారు. అతను ఎప్పుడూ క్రికెట్ విషయంలో సీరియస్‌గా కనిపించలేదని, అతని తీరు తనకు ఆగ్రహం తెప్పించేదని, దీంతో అతనిని పలుమార్లు హెచ్చరించానని చెప్పారు.