తన ఫేవరేట్ జట్టు 'రోహిత్‌'కు ఏం గిఫ్ట్ ఇచ్చిందో తెలుసా?!!

రియల్ మాడ్రిడ్‌ జెర్సీ:

'రో' అనే పేరుతో 45 నంబర్‌ ఉన్న జెర్సీని రియల్‌ మాడ్రిడ్‌ జట్టు మంగళవారం రోహిత్‌కు అందించింది. భారత జెర్సీపై కూడా రోహిత్‌ది 45వ నంబరే అన్న విషయం తెలిసిందే. రోహిత్‌కు జెర్సీ ఇస్తున్న ఫొటోని రియల్‌ మాడ్రిడ్‌ జట్టు తన అధికారిక ఇన్‌స్టాగ్రామ్‌ ఖాతాలో పోస్ట్‌ చేసింది. 'రోహిత్‌ శర్మ బెర్నాబూకి రావడం గొప్పగా ఉంది' అని రాసుకొచ్చింది. రోహిత్‌ కూడా తన ఇన్‌స్టాలో ఆ ఫొటోని షేర్ చేశాడు. స్వాగతం పలికిన రియల్ మాడ్రిడ్‌కు ధన్యవాదాలు తెలిపాడు.

సమైరాతో సందడి:

అంతకుముందు మాడ్రిడ్ నగరాన్ని సందర్శించడానికి సహాయం చేసినందుకు 'లా లిగా' నిర్వాహకులు, రియల్ మాడ్రిడ్‌ జట్టుకు రోహిత్ శర్మ కృతజ్ఞతలు తెలిపిన సంగతి తెలిసిందే. అంతేకాదు ఈ పర్యటన అద్భుతంగా సాగిందని, ఓ మధుర జ్ఞాపకంగా మిగిలిపోయిందని రోహిత్ పేర్కొన్నాడు. రెండు రోజుల క్రితం సాంటియాగో బెర్నాబూ స్టేడియంలో భార్య రితిక, కూతురు సమైరాతో రోహిత్ సందడి చేసాడు.

న్యూజిలాండ్‌ పర్యటనలో గాయం:

రోహిత్‌ శర్మకు న్యూజిలాండ్‌తో జరిగిన చివరి టీ20లో పిక్క గాయం అయిన విషయం తెలిసిందే. గాయం కారణంగా న్యూజిలాండ్‌ వన్డే, టెస్టు సిరీస్‌లకు దూరమయ్యాడు. గాయం అవ్వడంతో కివీస్ సిరీస్ మధ్య నుంచే రోహిత్ స్వదేశానికి తిరిగొచ్చేశాడు. ప్రస్తుతం విశ్రాంతి తీసుకుంటున్న హిట్‌మ్యాన్‌.. కుటుంబంతో కలిసి సరదాగా గడుపుతున్నాడు. ఈ క్రమంలోనే స్పెయిన్ ట్రిప్ వెళ్ళాడు.

దక్షిణాఫ్రికా సిరీస్‌తో పునరాగమనం:

కివీస్‌తో ముగిసిన వన్డే, టెస్ట్ సిరీస్‌లలో హిట్‌మ్యాన్‌ లేని లోటు స్పష్టంగా కనిపించింది. అద్భుత ఫామ్‌లో ఉన్న రోహిత్ జట్టులో లేకపోవడం కివీస్‌కు సానుకూలాంశంగా మారింది. హిట్‌మ్యాన్‌ జట్టులో ఉంటే వన్డే, టెస్ట్ సిరీస్‌లను భారత్ కోల్పోయే అవకాశాలు చాలా తక్కువ అని విశ్లేషకులు భావిస్తున్నారు. ప్రస్తుతం గాయం నుంచి కోలుకుంటున్న రోహిత్‌ మార్చి 12 నుంచి దక్షిణాఫ్రికాతో జరగబోయే మూడు వన్డేల సిరీస్‌లో ఆడే అవకాశాలు ఉన్నాయని సమాచారం.