RCBvsGT : బెంగళూరులో భారీ వర్షం.. ఆర్సీబీ ప్లేఆఫ్స్ ఆశలకు గండి కొట్టినట్లేనా?

ఐపీఎల్ ప్లేఆఫ్స్ చేరాలనే రాయల్ ఛాలెంజర్స్ బెంగళూరు ఆశలకు వాన దేవుడు గండి కొట్టేలా ఉన్నాడు. బెంగళూరులోని చిన్నస్వామి స్టేడియంలో ఆర్సీబీ తమ చివరి లీగ్ మ్యాచులో గుజరాత్ టైటాన్స్‌ను ఎదుర్కోవాల్సి ఉంది. అయితే ఈ మ్యాచ్ మొదలవడానికి ముందే బెంగళూరును వర్షాలు ముంచెత్తాయి.

మధ్యాహ్నం 3 గంటల వరకు వాతావరణం బాగానే ఉందని, అయితే అప్పటి నుంచి వాతావరణ సడెన్‌గా మారిపోయి భారీ వర్షం పడుతోందని ఫ్యాన్స్ సోషల్ మీడియా వేదికగా వెల్లడించారు. కొన్ని ప్రాంతాల్లో అయితే వడగండ్లు కూడా పడటం గమనార్హం. ఈ వర్షం ఇలాగే సాగితే ఆర్సీబీ, గుజరాత్ మధ్య మ్యాచ్ జరగడం చాలా కష్టంగా కనిపిస్తోంది.

ఈ మ్యాచ్ కనుక వర్షం కారణంగా రద్దయితే.. సన్‌రైజర్స్‌పై ముంబై గెలిస్తే చాలు. ఆ జట్టే ప్లేఆఫ్స్ చేరుకుంటుంది. ఒక వేళ సన్‌రైజర్స్ గెలిస్తే ఆర్సీబీకి అవకాశం ఉంటుంది. లేదంటే ఈసారి కూడా ఆర్సీబీకి నిరాశ తప్పదు. సన్‌రైజర్స్ తమ చివరి లీగ్ మ్యాచ్‌లో రాణించాలని అనుకుంటున్నట్లు ఆ టీం కెప్టెన్ ఎయిడెన్ మార్క్రమ్ చెప్పాడు.

అయితే వాంఖడే వేదికగా సన్‌రైజర్స్, ముంబై ఇండియన్స్ మ్యాచ్ జరుగుతోంది. ఈ స్టేడియంలో ముంబైని ఓడించడం అంత ఈజీ కాదు. ఇక్కడ ముంబై రికార్డు అద్భుతంగా ఉంది. ముఖ్యంగా ఆ టీం కీలక ప్లేయర్ సూర్యకుమార్ యాదవ్ ఈ స్టేడియంలో చెలరేగడం అలవాటుగా మార్చుకున్నాడు. ఇలాంటి సమయంలో ముంబై ఓడిపోవడం దాదాపు అసాధ్యం.

ఇలాంటి సమయంలో ఆర్సీబీ ప్లేఆఫ్స్ చేరాలంటే.. గుజరాత్‌ను ఓడించడం తప్ప మరెటువంటి ఆప్షన్ లేదు. కానీ బెంగళూరులో భారీ వర్షంతో అసలు ఈ మ్యాచ్ జరుగుతుందా? అనే అనుమానాలు నెలకొన్నాయి. ఈ మ్యాచ్ కనుక రద్దయితే రెండు జట్లకు చెరో పాయింట్ దక్కుతుంది. అప్పుడు ఆర్సీబీ పాయింట్ల సంఖ్య 15కు చేరుతుంది. సన్‌రైజర్స్‌పై ముంబై గెలిస్తే ఆ జట్టు పాయింట్ల సంఖ్య 16కు చేరుతుంది. దీంతో ఆ టీం నేరుగా ప్లేఆఫ్స్ చేరుకుంటుంది.