MI vs RCB: ముంబై కొంపముంచిన ఆర్సీబీ స్టార్.. ఓడితే ఇంటికే!

MI vs RCB: రాయపూర్ వేదికగా ఆర్సీబీ, ముంబై జట్ల మధ్య జరుగుతున్న కీలక పోరులో ముంబై ఇండియన్స్ జట్టు ముందుగా బ్యాటింగ్ చేసింది. ప్లేఆఫ్స్ రేసులో నిలవాలంటే ఇరు జట్లకు అత్యంత కీలకమైన ఈ పోరులో టాస్ గెలిచిన ఆర్సీబీ కెప్టెన్ రజత్ పాటిదార్ ముందుగా బౌలింగ్ ఎంచుకున్నాడు. మొదట బ్యాటింగ్ చేసిన ముంబై ఇండియన్స్ నిర్ణీత 20 ఓవర్లలో 166 పరుగులు చేసి.. బెంగళూరు ముందు 167 పరుగుల లక్ష్యాన్ని ఉంచింది.

ముంబైకి ఆదిలోనే షాక్.. నడ్డివిరిచిన భువీ
టాస్ ఓడి బ్యాటింగ్‌కు దిగిన ముంబై ఇండియన్స్‌కు ఆరంభంలోనే గట్టి ఎదురుదెబ్బ తగిలింది. ఆర్సీబీ సీనియర్ బౌలర్ భువనేశ్వర్ కుమార్ నిప్పులు చెరిగే బౌలింగ్‌తో ముంబై టాపార్డర్‌ను కుప్పకూల్చాడు. తొలి ఓవర్లోనే ఓపెనర్ ర్యాన్ రికెల్టన్ ఔట్ కాగా.. ఆ తర్వాత కొద్దిసేపటికే స్టార్ బ్యాటర్ రోహిత్ శర్మ (22) కూడా భువీకే చిక్కాడు. అంతటితో ఆగకుండా భువనేశ్వర్.. ముంబై కెప్టెన్ సూర్యకుమార్ యాదవ్‌ను డకౌట్ చేసి ముంబైని కోలుకోలేని దెబ్బ తీశాడు. మొత్తంగా ఈ మ్యాచ్‌లో భువీ 4 వికెట్లు పడగొట్టి తన పాత ఫామ్‌ను గుర్తుచేశాడు.

ఆదుకున్న తిలక్ వర్మ, నమన్ ధీర్
ఒకవైపు వికెట్లు పడుతున్నా యువ బ్యాటర్లు తిలక్ వర్మ, నమన్ ధీర్ సంయమనంతో ఆడి జట్టును ఆదుకున్నారు. వీరిద్దరూ కలిసి కీలక భాగస్వామ్యాన్ని నెలకొల్పి ముంబై స్కోరు బోర్డును ముందుకు నడిపించారు. తిలక్ వర్మ బాధ్యతాయుతమైన హాఫ్ సెంచరీ (57) సాధించగా.. నమన్ ధీర్ 47 పరుగులతో రాణించాడు. వీరిద్దరి పోరాటం వల్లే ముంబై ఇండియన్స్ గౌరవప్రదమైన స్కోరును సాధించగలిగింది. మిగిలిన బ్యాటర్లు విల్ జాక్స్, రాజ్‌ బావా విఫలమవడంతో ముంబై 166 పరుగుల వద్దే ఆగాల్సి వచ్చింది.

ప్లేఆఫ్స్ దిశగా ఆర్సీబీకి కీలక లక్ష్యం
ప్రస్తుతం పాయింట్ల పట్టికలో మూడో స్థానంలో ఉన్న ఆర్సీబీకి ఈ విజయం చాలా అవసరం. ఫిలిప్ సాల్ట్ గాయంతో దూరం కావడంతో టాపార్డర్ బాధ్యత ఇప్పుడు విరాట్ కోహ్లీ, జాకబ్ బెథెల్‌పై ఉంది. ముంబై బౌలర్లలో జస్ప్రీత్ బుమ్రా నుంచి ఆర్సీబీకి గట్టి సవాలు ఎదురుకానుంది. ముంబైకి కూడా ఇది 'డూ ఆర్ డై' మ్యాచ్ కావడంతో, ఈ 167 పరుగుల లక్ష్యాన్ని కాపాడుకోవడానికి వారు సర్వశక్తులూ ఒడ్డుతారని విశ్లేషకులు భావిస్తున్నారు.