RCB vs GT: ధర్మశాలలో ధనాధన్ ఫైట్.. గెలిస్తే నేరుగా ఫైనల్‌కే!

ఐపీఎల్ 2026 ప్లేఆఫ్స్ సమరం మొదలైంది. లీగ్ దశ ముగియడంతో నేటి నుంచి అసలైన పోరుకు తెరలేవనుంది. టోర్నీలో అత్యంత కీలకమైన మొదటి క్వాలిఫైయర్ మ్యాచ్‌లో డిఫెండింగ్ ఛాంపియన్ రాయల్ ఛాలెంజర్స్ బెంగళూరు (RCB), గుజరాత్ టైటాన్స్ (GT) జట్లు తలపడనున్నాయి. ధర్మశాల క్రికెట్ స్టేడియం వేదికగా జరగనున్న ఈ మ్యాచ్‌లో గెలిచిన జట్టు నేరుగా ఫైనల్‌కు చేరుకుంటుంది. ఓడిన జట్టుకు ఎలిమినేటర్ విజేతతో ఆడేందుకు మరో అవకాశం (క్వాలిఫైయర్-2) ఉంటుంది. ఈ నేపథ్యంలో ఈ సీజన్‌లో ఇరు జట్ల రికార్డులు, బలాబలాల గురించి తెలుసుకుందాం.

ఐపీఎల్ 2026 లీగ్ దశ ముగియగా, డిఫెండింగ్ ఛాంపియన్ ఆర్సీబీ అగ్రస్థానాన నిలిచింది. రన్‌రేట్‌తో గుజరాత్ టైటాన్స్ రెండో స్థానం దక్కించుకుంది. ఇరు జట్లు 14 లీగ్ మ్యాచ్‌ల్లో చెరో తొమ్మిది విజయాలు సాధించాయి. క్వాలిఫైయర్-1లో గెలుపునకు ఆర్సీబీ బలమైన పోటీదారు అయినా, గుజరాత్ తక్కువ కాదు. విజేత నేరుగా ఫైనల్ చేరగా, ఓడిన జట్టుకు మరో అవకాశం లభిస్తుంది.

లీగ్ దశలో ఆర్సీబీ, గుజరాత్ జట్లు రెండుసార్లు తలపడి, 1-1తో సమంగా నిలిచాయి. తొలి మ్యాచ్‌లో ఆర్సీబీ నెగ్గగా, రెండో పోరులో గుజరాత్ నాలుగు వికెట్ల తేడాతో ప్రతీకారం తీర్చుకుంది. గణాంకాలు ఆర్సీబీకి అనుకూలం. బెంగళూరులో 206 పరుగుల లక్ష్యాన్ని ఆర్సీబీ ఏడు బంతులు మిగిలి ఉండగానే ఛేదించింది.

క్వాలిఫైయర్-1 ధర్మశాలలో జరగనుంది. బెంగళూరు పిచ్‌ మాదిరిగానే చిన్న మైదానం కావడంతో ఆర్సీబీకి అనుకూలం. జట్టులో ఏడో నంబర్ బ్యాటర్ వరకు పవర్‌ హిట్టింగ్ సామర్థ్యం ఉంది. బ్యాటింగ్ లేదా ఛేజింగ్‌లో ఆర్సీబీని పటిష్ట స్థితిలో ఇది నిలుపుతుంది.

గుజరాత్ మిడిలార్డర్ బ్యాటర్లకు ఈ సీజన్లో పెద్దగా బ్యాటింగ్ చేసే అవకాశం రాలేదు. గుజరాత్ బ్యాటింగ్ భారం కెప్టెన్ శుభ్‌మన్ గిల్, సాయి సుదర్శన్‌లపైనే. వీరు నిలబడితే, ఆర్సీబీకి సవాల్ తప్పదు గుజరాత్ బౌలింగ్ ఐపీఎల్ 2026లో అద్భుతంగా రాణించింది. మహ్మద్ సిరాజ్, రషీద్ ఖాన్, జాసన్ హోల్డర్ వంటి బౌలర్లు కీలక సమయాల్లో వికెట్లు తీసి విజయాలు అందించారు. గుజరాత్ టైటాన్స్ పూర్తి శక్తిని ప్రదర్శిస్తే, క్వాలిఫైయర్-1 పోరు ఉత్కంఠగా మారుతుంది.