స్పిన్‌తో తిప్పేసిన రషీద్: బంగ్లాతో ఏకైక టెస్టులో ఆప్ఘన్ భారీ విజయం

తొలి ఇన్నింగ్స్‌లో ఐదు వికెట్లు తీసిన రషీద్ ఖాన్

ఈ మ్యాచ్ తొలి ఇన్నింగ్స్‌లో ఐదు వికెట్లు తీసిన రషీద్ ఖాన్ రెండో ఇన్నింగ్స్‌లో ఆరు వికెట్లు పడగొట్టాడు. వర్షం అంతరాయం కలిగించిన ఈ మ్యాచ్‌లో ఆఖరి రోజైన సోమవారం 17.2 ఓవర్లలోనే బంగ్లాదేశ్ మిగతా నాలుగు వికెట్లు కోల్పోయి 173 పరుగులకే కుప్పకూలింది. దీంతో ఈ మ్యాచ్‌లో 224 పరుగుల తేడాతో ఘన విజయం సాధించింది.

టాస్ గెలిచి తొలుత బ్యాటింగ్

ఈ మ్యాచ్‌లో టాస్ గెలిచి తొలుత బ్యాటింగ్ చేసిన ఆప్ఘనిస్థాన్ 117 ఓవర్లకుగాను 342 పరుగులు చేసి ఆలౌటైంది. ఆప్ఘనిస్థాన్ తొలి ఇన్నింగ్స్‌లో రహ్మాత్ షా(102) సెంచరీతో చెలరేగగా... అప్ఘర్(92) తృటిలో సెంచరీ మిస్సయ్యాడు. ఆ తర్వాత బంగ్లాదేశ్ తన తొలి ఇన్నింగ్స్‌లో 70.5 ఓవర్లకు గాను 205 పరుగులకే కుప్పకూలింది.

397 పరుగుల విజయ లక్ష్యం

బంగ్లా బ్యాట్స్‌మెన్లలో మొమినుల్(52), మొసాదెక్(48) మినహా మిగితా వారందరూ స్వల్పస్కోర్‌కే పెవిలియన్‌కు చేరారు. దీంతో తొలి ఇన్నింగ్స్‌లో ఆప్ఘనిస్థాన్ 137 పరుగుల ఆధిక్యం లభించింది. ఇక, రెండో ఇన్నింగ్స్‌లో ఆఫ్ఘనిస్థాన్ 260 పరుగులు చేసింది. దీంతో బంగ్లాదేశ్‌కు 397 పరుగుల విజయ లక్ష్యాన్ని నిర్దేశించింది.

చెలరేగిన రషీద్ ఖాన్

ఆప్ఘన్ స్పిన్నర్లు ఎదుర్కొనలేక రెండో ఇన్నింగ్స్‌లో బంగ్లాదేశ్ 173 పరుగులకే ఆలౌటైంది. రెండో ఇన్నింగ్స్‌లో రషీద్ ఖాన్(49/6)తో చెలరేగడంతో బంగ్లా తక్కువ స్కోరుకే పరిమితమైంది. జహీర్ ఖాన్ మూడు వికెట్లు తీయగా... మహ్మద్ నబీ ఒక వికెట్ తీసుకున్నాడు.

స్కోరు వివరాలు

ఆప్ఘనిస్థాన్ తొలి ఇన్నింగ్స్: 342

బంగ్లాదేశ్ తొలి ఇన్నింగ్స్: 205

ఆప్ఘనిస్థాన్ రెండో ఇన్నింగ్స్: 260

బంగ్లాదేశ్ రెండో ఇన్నింగ్స్: 173

మ్యాచ్ ఫలితం: 224 పరుగుల తేడాతో ఆప్ఘన్ విజయం