లలిత్ మోడీకి హైకోర్టు నోటీసు

న్యూఢిల్లీ: ఇండియన్ ప్రీమియర్ లీగ్ (ఐపియల్) చైర్మన్ లలిత్ మోడీకి పంజాబ్ హైకోర్టు శుక్రవారం నోటీసు జారీ చేసింది. అనుమతి తీసుకోకుండా దేశం విడిచి వెళ్లినందుకు హైకోర్టు ఆయనకు ఆ నోటీసు జారీ చేసింది. జైపూర్ పేలుడు బాధితులకు డబ్బులు చెల్లించనందుకు దాఖలైన కేసులో మంజూరైన బెయిల్ ను ఎందుకు రద్దు చేయకూడదో తెలియజేయాలని హైకోర్టు లలిత్ మోడీని ప్రశ్నించింది.

నిరుడు మే 13వ తేదీన సంభవించిన బాంబు పేలుళ్ల బాధితుల సహాయం కోసం ముఖ్యమంత్రి సహాయ నిధికి ఆరు కోట్ల రూపాయలు ఇస్తున్నట్లు ఐపియల్ సీజన్ సందర్భంగా నిరుడు లలిత్ మోడీ ప్రకటించారు. అయితే ఈ నిధులు అందించడంలో అక్రమాలు జరిగాయని ఆరోపిస్తూ నాగరిక్ మోర్చా అనే ప్రభుత్వేతర సంస్థ (ఎన్జీవో) ఫిర్యాదు చేసింది. దాంతో పోలీసులు లలిత్ మోడీపై కేసు నమోదు చేశారు.